فوائد:
➊ ◈ امام نووی رحمہ اللہ کہتے ہیں: یہ حدیث دلیل ہے کہ سارے سر کا مسح مشروع اور باتفاق العلماء مستحب عمل ہے، کیونکہ اس عمل سے تمام سر مسح میں شامل ہو جاتا ہے اور سر کے سارے بالوں تک پانی پہنچ جاتا ہے۔ اور مالک، مزنی، جبائی اور احمد رحمہ اللہ سر کے تمام مسح کے وجوب کے قائل ہیں۔ [نيل الأوطار: 170/1]
➋ اس حدیث کی رو سے راجح مسئلہ یہی ہے کہ تمام سر کا مسح واجب ہے، کیونکہ قرآن میں سر کے مسح کا حکم دیا گیا ہے اور حقیقت میں لفظ رأس تمام سر کے لیے مستعمل ہے اور نبی کریم صلی اللہ علیہ وسلم نے اس حکم کی تکمیل میں پورے سر کا مسح کیا بھی ہے۔ لہذا حقیقت سے مجاز کی طرف کسی صورت عدول درست نہیں، بلکہ اسے حقیقی معنی پر محمول کرنا اولیٰ ہے۔ [المغنى مع الشرح الكبير: 142/1]