فوائد:
یہ احادیث دلیل ہیں کہ پگڑی پر مسح جائز ہے اور سر کے مسح کے قائم مقام ہے۔
◈ شوکانی رحمہ اللہ کہتے ہیں:
➊ پگڑی پر مسح کے بارے میں اہل علم کا اختلاف ہے اور اوزاعی، احمد بن حنبل، اسحاق بن راہویہ، ابوثور اور داؤد بن علی پگڑی پر مسح کے جواز کے قائل ہیں۔
اور امام شافعی رحمہ اللہ کا قول ہے کہ اگر پگڑی پر مسح کے متعلق حدیث صحیح ہو تو میرا بھی یہی موقف ہے۔
امام ترمذی بیان کرتے ہیں کہ کئی اہل علم صحابہ مثلاً ابوبکر، عمر اور انس رضی اللہ عنہم سے بھی پگڑی پر مسح کا جواز منقول ہے۔
➋ پگڑی پر مسح کے بارے میں ثابت احادیث کا ماحصل یہ ہے کہ فقط سر کا مسح، محض پگڑی کا مسح اور سر اور پگڑی کا مسح، یہ تین صورتیں ثابت ہیں۔