فوائد:
➊ ◈ مہلب رحمہ اللہ کہتے ہیں: (اس حدیث میں) نبی صلی اللہ علیہ وسلم نے جلد روزہ افطار کرنے کی ترغیب دی ہے تاکہ دن میں رات کی ساعت کا اضافہ نہ ہو کیونکہ اس سے فرض کی مدت بڑھ جاتی ہے۔ اور افطاری میں اس لیے بھی عجلت کرنی چاہیے کہ روزہ جلد افطار کرنا روزہ دار کے لیے زیادہ مفید اور آئندہ روزہ کے لیے تقویت کا باعث ہے۔ [شرح ابن بطال: 122/7]
➋ ◈ امام نووی رحمہ اللہ کہتے ہیں: (ان احادیث میں) غروب آفتاب کے ثبوت کے بعد جلد روزہ افطار کی ترغیب ہے۔ اور جب تک امت اس سنت کی محافظت کرے گی ان میں اتحاد و یگانگت رہے گی اور یہ خیر پر رہے گی۔ اور جب یہ افطاری میں تاخیر کریں گے تو ان میں فساد پھوٹ پڑے گا اور یہ باہمی فساد میں مبتلا ہو جائیں گے۔ (لہذا باہمی فساد سے بچاؤ کا ایک حل افطاری میں تعجیل ہے)۔ [شرح النووی: 75/4]