فوائد:
➊ ماہ رمضان المبارک میں رسول اللہ صلی اللہ علیہ وسلم سے نماز تراویح گیارہ رکعت ثابت ہے اور نماز وتر میں رسول اللہ صلی اللہ علیہ وسلم سے رات کے وقت تیرہ نوافل پڑھنا بھی ثابت ہے۔ لہٰذا نماز تراویح میں رسول اللہ صلی اللہ علیہ وسلم کی اتباع ملحوظ رکھی جائے۔ کیونکہ نبی صلی اللہ علیہ وسلم سے نماز وتر ایک رکعت سے لے کر تیرہ رکعت تک وتر پڑھنا ثابت ہے۔ اس سے زیادہ رات کے کئی نوافل ثابت نہیں۔ سو نیکی کے جذبے اور وفورِ شوقِ عبادت میں اس مسنون نماز تراویح سے تجاوز نہ کیا جائے۔
➋ رسول اللہ صلی اللہ علیہ وسلم سے بیس رکعت، تیس رکعت یا اس سے زائد عدد میں نماز تراویح ثابت نہیں، بلکہ آپ صلی اللہ علیہ وسلم نے شب بھر قیام کے دوران بھی گیارہ رکعت نماز تراویح ہی کا اہتمام کیا۔ سو قیام کو لمبا کیا جائے، نہ کہ دھڑا دھڑ نوافل ادا کرنے سے ان کی تعداد چالیس پچاس تک پہنچا دیں۔