فوائد:
➊ تمام اہل اسلام کا اس مسئلہ پر اجماع ہے کہ وضو اور غسل میں کتنا پانی کافی ہو اس کی مقدار معین نہیں ہے بلکہ غسل کے لیے قلیل و کثیر پانی کافی ہے بشرطیکہ غسل کی شرط پائی جائے، یعنی تمام اعضاء پر پانی بہایا جائے۔
◈ امام شافعی رحمہ اللہ کہتے ہیں:
«بسا اوقات قلیل پانی کا استعمال کافی ہو جاتا ہے اور کبھی بے تحاشا پانی کا استعمال ناکافی ہوتا ہے۔»
علماء کا بیان ہے کہ غسل وضو کی مستحب صورت یہ ہے کہ غسل میں پانی ایک صاع سے کم نہ ہو اور وضو میں پانی کی مقدار ایک مد سے کم نہ ہو۔
➋ تمام علماء کا پانی کے اسراف کی ممانعت پر اجماع ہے، خواہ انسان دریا کے کنارے پر ہو، یہ ممانعت مکروہ تنزیہی ہے اور بعض شافعیہ کا موقف ہے کہ پانی کا اسراف حرام ہے۔
➌ مرد و عورت کا ایک برتن سے اکٹھے غسل کرنا بالاجماع جائز ہے اور عورت کا مرد کے بچے ہوئے پانی سے غسل کرنا بھی بالاجماع جائز ہے، لیکن مرد کا عورت کے بچے ہوئے پانی سے غسل کرنا شافعیہ، مالک، ابو حنیفہ اور جمہور علماء کے نزدیک جائز ہے، خواہ عورت مرد کے ساتھ غسل کرے یا تنہا غسل کرے۔ [شرح النووي: 1/3]