فوائد:
➊ ان احادیث میں دلیل ہے کہ دائرہ اسلام میں داخل ہونے کی صورت میں نو مسلم شخص کے لیے غسل مشروع ہے، نیز بعض علماء اس غسل کے وجوب کے قائل ہیں اور اکثر علماء کے نزدیک یہ غسل مستحب ہے۔ [تحفة الأحوذي: 152/3]
➋ بظاہر احادیثِ باب اس غسل کے وجوب کی متقاضی ہیں، کیونکہ بعض نو مسلم صحابہ کو غسل کا حکم دینے سے تبلیغ کا مقصود ہو جاتا ہے اور یہ دعویٰ کہ نبی صلی اللہ علیہ وسلم نے خاص صحابہ کو غسل کا حکم دیا تھا، جبکہ اکثریت کو یہ حکم نہیں دیا گیا، اس سے غسل کے استحباب کی دلیل لینا درست نہیں، کیونکہ دیگر صحابہ کو حکم نہ دینا نامعلوم ہے۔ (لہٰذا یہ استدلال مرجوح ہے)۔ [نیل الأوطار: 243/1]