فوائد:
➊ یہ احادیث دلیل ہیں کہ نماز کی ہر رکعت میں امام و ماموم (ہر نمازی) پر سورہ فاتحہ کی قراءت واجب اور صحت نماز کی شرط ہے کہ سورہ فاتحہ کی تلاوت کے بغیر نماز نہیں ہوتی کیونکہ لا صلاة میں لاۓ نفی جنس یا کم از کم نفی صحت ہے۔ نیز لفظ حداج: اونٹنی کا وہ بچہ جو حمل کے ایام پورا ہونے سے پہلے ضائع کر دے۔ صریح نص ہے کہ سورہ فاتحہ کی تلاوت کے بغیر پڑھی ہوئی نماز بے سود اور ناقابل اعتبار ہے۔
➋ ◈ امام نووی رحمہ اللہ کہتے ہیں: (یہ احادیث دلیل ہیں کہ) نماز میں سورہ فاتحہ کی قراءت واجب ہے اور معذور شخص کے سوا کسی اور سورت کی تلاوت یا ذکر (صحت نماز کے لیے) ناکافی ہے۔ مالک، شافعی اور جمہور علماء کا یہی موقف ہے اور ابوحنیفہ سمیت کچھ لوگوں کا مذہب ہے کہ سورہ فاتحہ کی تلاوت واجب نہیں۔ [صحيح مسلم بشرح النووي: 101/4]
◈ اس بحث کے آخر میں امام نووی رحمہ اللہ لکھتے ہیں کہ جمہور علماء کا موقف کہ نماز کی ہر رکعت میں سورہ فاتحہ کی قراءت واجب ہے راجح ہے کیونکہ آپ صلی اللہ علیہ وسلم نے دیہاتی شخص کو تلقین کی تھی کہ تمام نماز (یعنی ہر رکعت) میں اجمال (سورہ فاتحہ کی قراءت سمیت دیگر ارکان نماز) کی پابندی کر۔ [صحيح مسلم بشرح النووي: 102/4]
➌ ◈ عبدالرحمن مبارک پوری رحمہ اللہ بیان کرتے ہیں: احادیث الباب کا حاصل یہ ہے کہ ان احادیث سے جمہور علماء کا یہ استدلال کرنا کہ سورہ فاتحہ کی تلاوت نماز کا رکن ہے، صحیح ہے اس موقف پر کوئی غبار نہیں اور موقف راجح ہے۔ [تحفة الأحوذي: 45/2]
➍ ◈ امام شوکانی رحمہ اللہ کا بیان ہے کہ سورہ فاتحہ کی تلاوت نماز میں واجب ہی نہیں بلکہ صحت نماز کی شرط بھی ہے، کیونکہ سورہ فاتحہ کی عدم تلاوت سے نماز کا عدم لازم آتا ہے اور شرط کی یہی خاصیت ہوتی ہے۔ [نيل الأوطار: 217/2]