سیدنا عبداللہ بن عباس رضی اللہ عنہما نے فرمایا: بنی اسرائیل پر قتل کے بدلے قصاص فرض کیا گیا تھا اور ان میں معافی کا حکم نہ تھا، پھر اللہ عزوجل نے اس امت سے فرمایا: ﴿كُتِبَ عَلَيْكُمُ الْقِصَاصُ فِي الْقَتْلَىٰ الْحُرُّ بِالْحُرِّ وَالْعَبْدُ بِالْعَبْدِ وَالْأُنْثَىٰ بِالْأُنْثَىٰ فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْمَعْرُوفِ﴾ یعنی قصاص فرض ہے لیکن معاف کرنے کا اختیار بھی دیا گیا ہے، اور معافی یہ ہے کہ قاتل سے قصاص لینے کے بجائے دیت قبول کی جائے۔ «ذَلِكَ تَخْفِيفٌ مِنْ رَبِّكُمْ» یعنی تم سے پہلے جو حکم دیا گیا تھا، اس کے مقابلے میں یہ تمہارے رب کی طرف سے تخفیف ہے۔ «فَاتِّبَاعٌ بِالْمَعْرُوفِ وَأَدَاءٌ إِلَيْهِ بِإِحْسَانٍ» یعنی دیت لینے والے کو معروف طریقے سے مطالبہ کرنا چاہیے اور دینے والے کو احسان کے ساتھ ادا کرنی چاہیے۔ [سنن سعید بن منصور/كتاب التفسير/حدیث: 246]