سیدنا ابوسعید خدری رضی اللہ عنہ بیان کرتے ہیں کہ بنو عمرو بن عوف سے تعلق رکھنے والے ایک شخص اور بنو خدرہ سے تعلق رکھنے والے ایک شخص کے درمیان ﴿اس مسجد کے بارے میں جس کی بنیاد تقویٰ پر رکھی گئی ہے﴾ [سورة التوبة: 108] بحث ہو گئی، خدری شخص نے کہا: اس سے مراد نبی اکرم صلی اللہ علیہ وسلم کی مسجد ہے، عمری شخص نے کہا: اس سے مراد مسجدِ قبا ہے، راوی بیان کرتے ہیں کہ یہ دونوں صاحبان نکلے اور نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے اس بارے میں دریافت کیا، تو نبی اکرم صلی اللہ علیہ وسلم نے فرمایا: ”اس سے مراد یہ مسجد ہے، اس سے مراد اللہ کے رسول کی مسجد ہے، اور اس میں بہت زیادہ بھلائی ہے۔“ [صحیح ابن حبان/كتاب الصلاة/حدیث: 1626]