سیدنا ابوسعید خدری رضی اللہ عنہ، روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اس ذات کی قسم! جس کے دست قدرت میں میری جان ہے، تم سب لوگ ضرور جنت میں داخل ہو گے۔ ماسوائے اس شخص کے، جو انکار کرے اوراللہ تعالیٰ کے سامنے یوں سرکشی کرے، جس طرح اونٹ سرکشی کرتا ہے۔، لوگوں نے عرض کی: یا رسول اللہ! کون شخص جنت میں داخل ہونے سے انکار کرے گا؟ نبی اکرم صلی اللہ علیہ وسلم نے فرمایا: جو شخص میری اطاعت کرے گا، وہ جنت میں داخل ہو گا، اور جو میری نافرمانی کرے گا اس نے انکار کیا۔“
(امام ابن حبان رحمہ اللہ فرماتے ہیں:)اللہ تعالیٰ کے رسول کی فرمانبرداری یہ ہے: آپ کی سنت کی، اس کی کیفیت اور کمیت کو ترک کرتے ہوئے پیروی کی جائے اور ہر اس شخص کے قول کو مسترد کرتے ہوئے جس نےاللہ تعالیٰ کے دین کے بارے میں اپنی کوئی رائے پیش کی ہو، جو نبی اکرم صلی اللہ علیہ وسلم کی سنت کے برخلاف ہو۔ آدمی اس سنت کو ترک کرنے کے لئے کمزور تاویلات اور فضول اختراعی باتوں کا حیلہ پیش کرنے کی کوشش نہ کرے۔ [صحیح ابن حبان/المقدمة/حدیث: 17]