سیدنا ابوہریرہ رضی اللہ عنہ بیان کرتے ہیں: ایک شخص نے عرض کی: یا رسول اللہ! ایک شخص کوئی عمل کرتا ہے اور اسے پوشیدہ رکھتا ہے، لیکن جب اس کا عمل ظاہر ہو جاتا ہے، تو کیا یہ بات اسے اچھی لگنی چاہئے؟ نبی اکرم صلی اللہ علیہ وسلم نے فرمایا: ایسے شخص کو دو اجر ملیں گے۔ ایک پوشیدہ رکھنے کا اجر اور ایک ظاہر ہونے کا اجر۔ (امام ابن حبان رحمہ اللہ فرماتے ہیں:) روایت کے یہ الفاظ: ”بے شک ایک شخص ایک عمل کرتا ہے، اور وہ اسے پسند آتا ہے، اور وہ جب اس پر مطلع ہوا جائے، تو یہ چیز اسے اچھی لگتی ہے۔“ اس کا مطلب یہ ہے: آدمی اس بات پہ خوش ہوتا ہے کہاللہ تعالیٰ نے اسے اس عمل کی توفیق دی ہے، کیونکہ ہو سکتا ہے کہ اس بارے میں اس کی پیروی کی جائے، تو جب اس طرح کی صورتحال ہو، تو اسے دو طرح کا اجر ملے گا، اور جب آدمی کو یہ بات اس لیے اچھی لگے تاکہ لوگ اس کی تعظیم کریں گے یا اس کی طرف مائل ہوں گے، یہ ریا کی ایک قسم ہے ایسے شخص کو دگنا اجر نہیں ملے گا بلکہ اسے ایک اجر بھی نہیں ملے گا۔ [صحیح ابن حبان/كتاب البر والإحسان/حدیث: 375]