سیدنا انس بن مالک رضی اللہ عنہ، روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص دو بیٹیوں، یا تین بیٹیوں، یا دو بہنوں، یا تین بہنوں کی کفالت کرے، یہاں تک وہ شادی شدہ ہو جائیں، یا وہ شخص انہیں چھوڑ کر (ان کی کفالت کے دوران ہی) انتقال کر جائے، تو میں اور وہ شخص جنت میں اس طرح ہوں گے نبی اکرم صلی اللہ علیہ وسلم نے اپنی درمیانی انگلی اور اس کے ساتھ والی انگلی کے ذریعے اشارہ کر کے (یہ بات ارشاد فرمائی)“ روایت کے یہ الفاظ ابراہیم بن حسن علاف کے نقل کردہ ہیں۔
(امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”میں اور وہ جنت میں ان دو کی طرح ہوں گے۔“ اس سے مراد داخل ہونے اور سبقت لے جانے کے حوالے سے ہے۔ اس کا یہ مطلب نہیں ہے کہ دو بیٹیوں، یا دو بہنوں کی کفالت کرنے والا شخص جنت میں اس مرتبے پر فائز ہو گا، جو نبی اکرم صلی اللہ علیہ وسلم کا ہے۔ [صحیح ابن حبان/كتاب البر والإحسان/حدیث: 447]