سیدہ عائشہ صدیقہ رضی اللہ عنہا بیان کرتی ہیں: میں نے کبھی نبی اکرم صلی اللہ علیہ وسلم کو کسی خادم کو مارتے ہوئے نہیں دیکھا، نہ ہی آپ صلی اللہ علیہ وسلم نے کبھی اپنی کسی اہلیہ کو مارا، نہ ہی آپ صلی اللہ علیہ وسلم نے اپنے ہاتھ کے ذریعے کسی چیز کو کبھی مارا، البتہ آپ صلی اللہ علیہ وسلم اللہ کی راہ میں جہاد کے دوران (دشمنوں کو مارتے تھے) اور جب بھی آپ صلی اللہ علیہ وسلم کے ساتھ کوئی زیادتی کی گئی، تو آپ صلی اللہ علیہ وسلم نے اس زیادتی کرنے والے سے انتقام نہیں لیا، البتہ اگر اللہ تعالیٰ کے لیے (انتقام لینا ہو، تو وہ لیا ہے)، کیونکہ اگر کوئی معاملہ اللہ تعالیٰ کے لیے ہوتا تھا، تو آپ صلی اللہ علیہ وسلم اس کا انتقام لیتے تھے اور جب بھی آپ صلی اللہ علیہ وسلم کے سامنے دو قسم کی صورت حال پیش آئی، تو آپ صلی اللہ علیہ وسلم نے ان میں سے اس صورت حال کو اختیار کیا جو زیادہ آسان تھی، بشرطیکہ وہ گناہ نہ ہو، کیونکہ اگر وہ گناہ ہوتی، تو آپ صلی اللہ علیہ وسلم سب سے زیادہ اس سے دور رہتے تھے۔ [صحیح ابن حبان/كتاب البر والإحسان/حدیث: 488]