سیدنا نعمان بن بشیر رضی اللہ عنہما بیان کرتے ہیں کہ نبی اکرم صلی اللہ علیہ وسلم سیدنا بشیر بن سعد رضی اللہ عنہ کے پاس تشریف لائے تو انہوں نے عرض کی: یا رسول اللہ صلی اللہ علیہ وسلم ! (میری بیوی) عمرہ بنت رواحہ رضی اللہ عنہا نے یہ ارادہ کیا کہ میں اس کے بیٹے کو کوئی چیز عطیے کے طور پر دوں، اس نے مجھے کہا کہ میں آپ کو اس بات پر گواہ بنا لوں۔ نبی اکرم صلی اللہ علیہ وسلم نے ان سے فرمایا: ”کیا تمہارے اس کے علاوہ اور بھی بچے ہیں؟“ انہوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”کیا تم نے ان سب کو عطیہ دیا ہے، جس طرح تم نے اسے عطیہ دیا ہے؟“ اس نے عرض کی: جی نہیں، تو نبی اکرم صلی اللہ علیہ وسلم نے فرمایا: ”پھر تم زیادتی کے کام میں مجھے گواہ نہ بناؤ۔“ [صحیح ابن حبان/كتاب الهبة/حدیث: 5105]