ابوہیثم دخین، یہ سیدنا عقبہ بن عامر رضی اللہ عنہ کے دستِ راست تھے، وہ بیان کرتے ہیں: میں نے سیدنا عقبہ بن عامر رضی اللہ عنہ سے کہا: ہمارے کچھ پڑوسی شراب پیتے ہیں، میں کوتوال کو بلانا چاہتا ہوں تاکہ وہ انہیں پکڑ لے، تو سیدنا عقبہ رضی اللہ عنہ نے فرمایا: تمہارا ستیاناس ہو، تم ایسا نہ کرو، تم انہیں واضح نصیحت کرو، تم انہیں ڈراؤ، انہوں نے کہا: میں نے انہیں منع کیا ہے، لیکن وہ باز نہیں آئے، اب میں کوتوال کو بلاؤں گا تاکہ وہ انہیں پکڑ لے، تو سیدنا عقبہ رضی اللہ عنہ نے کہا: تمہارا ستیاناس ہو، تم ایسا نہ کرو، میں نے نبی اکرم صلی اللہ علیہ وسلم کو یہ بات ارشاد فرماتے سنا ہے: ”جو شخص کسی مومن کی پردہ پوشی کرتا ہے، تو اس کی مثال اسی طرح ہے، جیسے وہ زندہ گاڑ دی جانے والی بچی کو اس کی قبر میں سے بچا لیتا ہے۔“ [صحیح ابن حبان/كتاب البر والإحسان/حدیث: 517]