ابن بریدہ اپنے والد کا یہ بیان نقل کرتے ہیں کہ ہم لوگ نبی اکرم صلی اللہ علیہ وسلم کے ساتھ سفر کر رہے تھے، آپ صلی اللہ علیہ وسلم نے ہمارے ساتھ ایک جگہ پڑاؤ کیا، ہم ایک ہزار کے قریب سوار تھے، نبی اکرم صلی اللہ علیہ وسلم نے ہمیں دو رکعات پڑھائیں پھر آپ صلی اللہ علیہ وسلم ہماری طرف متوجہ ہوئے تو آپ صلی اللہ علیہ وسلم کی آنکھوں سے آنسو جاری تھے، سیدنا عمر رضی اللہ عنہ آپ صلی اللہ علیہ وسلم کے سامنے کھڑے ہوئے، انہوں نے اپنے ماں باپ کو آپ صلی اللہ علیہ وسلم پر قربان کیا اور عرض کی: ”یا رسول اللہ صلی اللہ علیہ وسلم ! آپ کو کیا ہوا ہے؟“ نبی اکرم صلی اللہ علیہ وسلم نے فرمایا: ”میں نے اپنی والدہ کے لیے دعائے مغفرت کی اجازت مانگی، مجھے اجازت نہیں ملی، تو ان کے ساتھ رحمت کی وجہ سے میری آنکھوں سے آنسو جاری ہو گئے، ان کے جہنم میں ہونے کی وجہ سے۔ میں نے تمہیں تین چیزوں سے منع کیا تھا؛ قبروں کی زیارت کرنے سے، اب تم ان کی زیارت کیا کرو کیونکہ قبروں کی زیارت بھلائی میں اضافہ کرے گی، میں نے تمہیں قربانی کا گوشت تین دن سے زیادہ رکھنے سے منع کیا تھا، اب تم جب تک چاہو اسے روک کے رکھو، میں نے تمہیں مخصوص قسم کے برتنوں میں مشروب پینے سے منع کیا تھا، اب تم جس طرح کے برتن میں چاہو مشروب پیو، البتہ کوئی نشہ آور چیز نہ پینا۔“ [صحیح ابن حبان/كتاب الأشربة/حدیث: 5390]