سیدنا علی بن ابی طالب رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”میں نے کبھی بھی کسی ایسی برائی کرنے کا ارادہ نہیں کیا جو زمانہ جاہلیت کے لوگ کیا کرتے تھے، البتہ دو مرتبہ ارادہ کیا اور دونوں مرتبہ اللہ تعالیٰ نے مجھے ان سے بچا لیا۔ (پھر نبی اکرم صلی اللہ علیہ وسلم نے بتایا:) ایک مرتبہ میں ایک قریشی نوجوان کے ساتھ اپنے گھر والوں کی بکریاں مکہ کے بالائی حصے میں چرا رہا تھا، میں نے اپنے ساتھی نوجوان سے کہا: تم نے آج میری بکریوں کا دھیان رکھنا ہے، آج رات میں مکہ میں اسی طرح وقت بسر کروں گا جس طرح نوجوان گزارتے ہیں۔ اس نے کہا: ٹھیک ہے۔ میں وہاں سے روانہ ہوا، جب میں مکہ کے آخری کونے میں موجود گھر کے پاس پہنچا تو وہاں مجھے گانے، دف بجانے اور موسیقی کے آلات کی آواز آئی، میں نے دریافت کیا: یہ کیا ہے؟ تو لوگوں نے بتایا: فلاں شخص نے فلاں عورت کے ساتھ شادی کی ہے (انہوں نے قریش کے ایک شخص کی قریش کی ایک خاتون کے ساتھ شادی کرنے کے بارے میں بتایا)۔ میں اس گانے اور آواز کو سننے لگا، اسی دوران میری آنکھ لگ گئی اور میں سو گیا، یہاں تک کہ مجھے دھوپ کی تپش نے بیدار کیا، پھر میں اپنے ساتھی کے پاس واپس آیا، اس نے دریافت کیا: تم نے کیا کیا؟ میں نے اسے اس بارے میں بتایا۔ پھر دوسری رات بھی اسی طرح ہوا، میں وہاں سے روانہ ہوا اور میں نے اسی طرح کی آواز سنی، مجھ سے وہی بات کہی گئی جو پہلے کہی گئی تھی، میں نے اسی طرح کی آواز سنی جس طرح پہلے سنی تھی، یہاں تک کہ میری آنکھ لگ گئی اور پھر مجھے سورج کی تپش نے بیدار کیا، میں پھر اپنے ساتھی کے پاس آیا، اس نے دریافت کیا: تم نے کیا کیا؟ میں نے کہا: میں نے کچھ نہیں کیا۔“ نبی اکرم صلی اللہ علیہ وسلم فرماتے ہیں: «فَوَاللّٰهِ» ”اللہ کی قسم! اس کے بعد میں نے کبھی کسی ایسی برائی کا ارادہ نہیں کیا جو زمانہ جاہلیت کے لوگ کیا کرتے تھے، یہاں تک کہ اللہ تعالیٰ نے اپنی نبوت کے ذریعے مجھے سرفراز فرمایا۔“ [صحیح ابن حبان/كتاب التاريخ/حدیث: 6272]