سیدنا ابوسعید خدری رضی اللہ عنہ اور سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے فرمایا:اللہ تعالیٰ انتظار کرتا ہے، یہاں تک کہ جب ایک تہائی رات گزر جاتی ہے، تو ہمارا پروردگار آسمان دنیا کی طرف نزول کرتا ہے ہمارا پروردگار فرماتا ہے: کیا کوئی مغفرت طلب کرنے والا ہے۔ کیا کوئی توبہ کرنے والا ہے۔ کیا کوئی مانگنے والا ہے؟ کیا کوئی دعا کرنے والا ہے؟ (نبی اکرم صلی اللہ علیہ وسلم نے فرمایا:) ایسا صبح صادق تک ہوتا رہتا ہے۔
(امام ابن حبان رحمہ اللہ فرماتے ہیں:) امام مالک نے زہری کے حوالے سے جو روایت نقل کی ہے، جیسے ہم نے ذکر کیا ہے، جب ایک تہائی رات باقی رہ جاتی ہے، تواللہ تعالیٰ نزول کرتا ہے، اور ابواسحاق کی الاغر کے حوالے سے منقول روایت میں یہ بات مذکور ہے، وہ نزول کرتا ہے، یہاں تک کہ رات کا ایک تہائی حصہ گزر جاتا ہے، تو اس میں اس بات کا احتمال موجود ہے، کچھ راتوں میں وہ اس وقت نزول کرتا ہو جب رات کا ایک تہائی حصہ باقی رہ جاتا ہو اور بعض راتوں میں اس وقت نزول کرتا ہو جب رات کا ایک تہائی ابتدائی حصہ رخصت ہو جاتا ہو۔ اس طرح دونوں روایات میں اختلاف اور تضاد نہیں رہے گا۔ [صحیح ابن حبان/كتاب الرقائق/حدیث: 921]