سیدنا ابوامامہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: جب نداء دینے والا نداء دیتا ہے (یعنی مؤذن اذان دیتا ہے) تو آسمان کے دروازے کھول دئیے جاتے ہیں اور دعا کو قبول کیا جاتا ہے، اس لیے کوئی شخص کسی تکلیف یا مصیبت میں مبتلا ہو تو وہ مؤذن (کی اذان) کا انتظار کرے۔ پھر جب وہ اللہ اکبر کہے تو تم بھی اللہ اکبر کہو، جب وہ کلمہ شہادت پڑھے تو تم بھی کلمۂ شہادت پڑھو اور جب وہ حیّ علی الصلوٰۃ پڑھے تو تم بھی حیّ علی الصلوٰۃ پڑھو اور جب وہ حیّ علی الفلاح پڑھے، تو تم بھی حیّ علی الفلاح پڑھو پھر (جب اذان ختم ہو جائے تو) یہ دعا مانگو: اللّٰھمّ ربّ ھذہ الدعوۃ الصادقۃ المستجابۃ المستجاب لھا دعوۃ الحق، وکلمۃ التقوی، احینا علیھا وامتنا علیھا، وابعثنا علیھا، واجعلنا من خیار اھلھا احیاء وامواتا۔ ” اے اللہ! اے اس سچی، مقبول دعوت کے رب، تو اس دعوتِ حق اور کلمۂ تقویٰ کو قبول کرنے والا ہے۔ تو ہمیں اسی پر زندہ رکھ اور اسی پر موت عطا کر اور ہمیں قیامت کے روز اسی پر اُٹھا اور ہمیں زندگی میں اور بعد از وفات اس کے اچھے اہل میں شامل فرما “ یہ دعا مانگنے کے بعد پھر اللہ تعالیٰ سے اپنی حاجت کی دعا مانگے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2027]