سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ہر نیکی صدقہ ہے اور آدمی جو کچھ اپنی ذات اور اپنے بیوی بچوں کے لیے خرچ کرتا ہے، اس کے لیے صدقے کا ثواب لکھا جاتا ہے اور آدمی جو کچھ اپنی عزت کی حفاظت کی خاطر خرچ کرتا ہے، اس کے بدلے میں صدقہ کا ثواب لکھا جاتا ہے اور مؤمن جو بھی خرچہ کرتا ہے، اگر اس کو اللہ کے سپرد کر دے تو اللہ تعالیٰ اس کا ضامن ہوتا ہے، سوائے اس خرچ کے جو مکانات کی تعمیر میں یا گناہ کے راستے میں خرچ ہوا۔ (عبدالحمید بن حسن فرماتے ہیں) میں نے محمد بن منکدر سے پوچھا: آدمی اپنی عزت کی حفاظت کے لیے کیا خرچ کرتا ہے؟ انہوں نے کہا: جو کچھ شاعروں اور ناقدین کو دیتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ ایک حدیث مذکورہ حدیث کی شاہد ہے لیکن وہ ہماری اس کتاب کے معیار پر نہیں ہیں (وہ حدیث درج ذیل ہیں) [المستدرك على الصحيحين/كتاب : البيوع/حدیث: 2342]