سیدنا عمرو بن شعیب رضی اللہ عنہ اپنے والد سے روایت کرتے ہیں، ایک آدمی عبداللہ بن عمرو رضی اللہ عنہ کے پاس آیا اور ایک ایسے شخص کے بارے میں مسئلہ پوچھا، جس نے حالت احرام میں اپنی بیوی کے ساتھ ہم بستری کی تھی تو انہوں نے عبداللہ بن عمر رضی اللہ عنہما کی طرف اشارہ کرتے ہوئے کہا: ان سے جا کر مسئلہ پوچھو، شعیب فرماتے ہیں: وہ آدمی ان کو نہ پہچان سکا، اس لیے میں اس کے ساتھ گیا، اس نے ابن عمر رضی اللہ عنہما سے مسئلہ پوچھا تو آپ نے فرمایا: تیرا حج ضائع ہو گیا، اس آدمی نے کہا: تو میں کیا کروں؟ آپ نے فرمایا: لوگوں کے ساتھ احرام باندھے رکھو اور جیسے یہ ارکان ادا کرتے ہیں تم بھی کرتے رہو اور اگلے سال دوبارہ حج کرو اور قربانی دو، وہ شخص لوٹ کر عبداللہ بن عمر رضی اللہ عنہما کے پاس آیا، میں بھی اس کے ہمراہ تھا، عبداللہ بن عمر رضی اللہ عنہما نے کہا: ابن عباس رضی اللہ عنہما کے پاس جا کر پوچھو۔ میں اس کے ہمراہ ابن عباس رضی اللہ عنہما کے پاس گیا اور ان سے مسئلہ پوچھا، تو انہوں نے بھی ابن عمر رضی اللہ عنہما کی طرح جواب دیا، پھر ہم دونوں عبداللہ بن عمرو رضی اللہ عنہ کے پاس آئے اور ان کو ابن عباس رضی اللہ عنہما کا جواب دیا، پھر عبداللہ بن عمرو رضی اللہ عنہ نے (اسے) کہا تم کیا کہتے ہو؟ اس نے جواب دیا: میں بھی وہی کہتا ہوں جو دونوں بزرگوں نے کہا ہے۔ ٭٭ اس حدیث کے تمام راوی ثقہ ہیں، حافظ ہیں اور یہ حدیث شعیب بن محمد کے ان کے دادا عبداللہ بن عمر سے سماع کے ثبوت پر مضبوط دلیل ہیں۔ (نوٹ): امام بخاری رحمۃ اللہ علیہ اور امام مسلم رحمۃ اللہ علیہ کے معیار پر کتاب البیع میں جتنی احادیث مجھے مل سکی ہیں، یہ حدیث ان میں سے آخری ہے اور اس کتاب کے ضمن میں، میں نے ایسی کئی کتابوں کا ذکر کر دیا ہے جس کا عنوان امام بخاری رحمۃ اللہ علیہ نے کتاب البیوع کے آخر میں ذکر کیا ہے اور ان کتب کی وضاحت میں نے آخر میں اس لیے ذکر کر دی ہے تاکہ کسی کو یہ غلط فہمی نہ رہے کہ میں نے کتاب البیوع کو ان کتابوں سے خالی رکھا ہے اور اللہ ہی مددگار ہے، میری اس کاوش پر جو میں شیخین رحمۃ اللہ علیہما کے نقش قدم پر چلتے ہوئے احادیث کو متصل کرنے کی کوشش کر رہا ہوں، وہی مجھے کافی ہے اور وہی کارساز ہے۔ (کتاب البیوع کے ضمن میں ذکر ہونے والی کتابوں کے نام درج ذیل ہیں)۔ کتاب المسلم، کتاب الشفعۃ، کتاب الاجارہ، کتاب الحوالہ۔ کتاب الحرث۔ کتاب المزارعۃ۔ کتاب المساقاۃ۔ کتاب العطایا۔ کتاب الہبات۔ کتاب القراض۔ کتاب اللقطۃ۔ کتاب المظالم۔ کتاب التعفف عن المسئلۃ۔ کتاب الرہن۔ کتاب الشرکۃ۔ کتاب العتق۔ کتاب المکاتب۔ کتاب الشہادات۔ کتاب الصلح۔ کتاب الشروط۔ کتاب الوصایا۔ کتاب الوقف۔ [المستدرك على الصحيحين/كتاب : البيوع/حدیث: 2406]