سیدنا ابوہریرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”قیامت کے دن سب سے پہلے تین قسم کے لوگوں کا فیصلہ ہو گا (جو آگ میں جائیں گے)، ایک شخص کو لایا جائے گا تو وہ عرض کرے گا: اے میرے رب! تو نے مجھے کتاب (قرآن) کی تعلیم دی، میں نے تیرے ثواب کی امید میں اسے دن رات پڑھا، اس سے کہا جائے گا: تو نے جھوٹ بولا، تو نے تو اس لیے پڑھا تھا تاکہ کہا جائے کہ ”یہ بڑا قاری ہے“، اور وہ کہہ دیا گیا، اب اسے آگ کی طرف لے جاؤ، پھر دوسرے کو لایا جائے گا تو وہ کہے گا: اے رب! تو نے مجھے مال عطا کیا، میں نے تیرے ثواب اور جنت کی امید میں اس کے ذریعے صلہ رحمی کی اور صدقہ کیا، اس سے کہا جائے گا: تو نے جھوٹ بولا، تو نے تو اس لیے کیا تاکہ کہا جائے کہ ”یہ بڑا سخی ہے“، اور وہ کہہ دیا گیا، اب اسے آگ کی طرف لے جاؤ، پھر تیسرے کو لایا جائے گا تو وہ عرض کرے گا: اے رب! میں تیری راہ میں نکلا اور تیرے ثواب کی امید میں قتال کیا یہاں تک کہ میں پیٹھ پھیرے بغیر (دشمن کے) سامنے لڑتے ہوئے شہید ہو گیا، اس سے کہا جائے گا: تو نے جھوٹ بولا، تو نے تو اس لیے قتال کیا تھا تاکہ کہا جائے کہ ”یہ بڑا نڈر اور بہادر ہے“، اور وہ کہہ دیا گیا، اب اسے آگ کی طرف لے جاؤ۔“
یہ حدیث صحیح الاسناد ہے لیکن شیخین نے اسے اس سیاق کے ساتھ روایت نہیں کیا۔ [المستدرك على الصحيحين/كتاب : الجهاد/حدیث: 2560]