سیدنا عبداللہ بن مسعود رضی اللہ عنہ سے روایت ہے کہ ام المومنین سیدہ ام حبیبہ رضی اللہ عنہا نے دعا کی: ”اے اللہ! مجھے میرے شوہر رسول اللہ صلی اللہ علیہ وسلم ، میرے والد ابوسفیان اور میرے بھائی معاویہ (کی زندگیوں) سے فائدہ دے،“ تو رسول اللہ صلی اللہ علیہ وسلم نے ان سے فرمایا: ”تم نے اللہ تعالیٰ سے ان میعادوں کے بارے میں دعا کی ہے جو طے شدہ ہیں، اور ان رزقوں کے بارے میں جو تقسیم ہو چکے ہیں، اور ان نقوشِ قدم کے بارے میں جو (اپنی انتہا تک) پہنچنے والے ہیں، ان میں سے کوئی چیز اپنے وقت سے پہلے نہیں آ سکتی اور نہ ہی اپنے وقت کے بعد پیچھے ہو سکتی ہے، اگر تم اللہ سے یہ دعا کرتیں کہ وہ تمہیں عافیت دے یا یہ سوال کرتیں کہ وہ تمہیں آگ کے عذاب سے یا قبر کے عذاب سے پناہ دے یا عافیت عطا فرمائے تو یہ تمہارے لیے زیادہ بہتر ہوتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3481]