ابووائل شقیق بن سلمہ رحمۃ اللہ علیہ فرماتے ہیں: سیدنا عبداللہ رضی اللہ عنہ نے یہ آیت پڑھی: بَلْ عَجِبْتَ وَ یَسْخَرُوْنَ (الصافات: 12) ” بلکہ تمہیں اچنبھا آیا اور وہ ہنسی کرتے ہیں۔“ شریح رحمۃ اللہ علیہ نے کہا: اللہ تعالیٰ کسی چیز سے حیران نہیں ہوتا صرف جاہل پر حیران ہوتا ہے۔ اعمش رحمۃ اللہ علیہ کہتے ہیں: میں نے اس بات کا تذکرہ ابراہیم رحمۃ اللہ علیہ سے کیا تو انہوں نے کہا: شریح رحمۃ اللہ علیہ کو ان کی اپنی یہ رائے بہت پسند تھی حالانکہ عبداللہ، شریح سے زیادہ علم والے ہیں اور عبداللہ رضی اللہ عنہ یہ پڑھا کرتے تھے ” بَلْ عَجِبْتُ “ (یعنی وہ اس کو واحد متکلم کا صیغہ پڑھتے تھے) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3650]