سیدنا عبداللہ بن عباس رضی اللہ عنہما سے اللہ عزوجل کے اس فرمان ﴿الَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ إِلَّا اللَّمَمَ﴾ ”وہ لوگ جو بڑے گناہوں اور بے حیائی کے کاموں سے بچتے ہیں سوائے ہلکے سے گناہ کے“ [سورة النجم: 32] کے متعلق روایت ہے کہ ( «اللمم» ‏‏‏‏ سے مراد وہ گناہ ہے) جس کا انسان کبھی کبھار ارتکاب کر بیٹھے اور پھر اس سے توبہ کر لے، سیدنا ابن عباس رضی اللہ عنہما نے فرمایا کہ نبی کریم صلی اللہ علیہ وسلم یہ کلمات فرمایا کرتے تھے: «إِنْ تَغْفِرِ اللَّهُمَّ تَغْفِرْ جَمَّا … وَأَيُّ عَبْدٍ لَكَ لَا أَلَمَّا» ”اے اللہ! اگر تو معاف فرمائے تو کثرت سے معاف فرمانے والا ہے، اور تیرا کون سا ایسا بندہ ہے جس سے کوئی لغزش یا چھوٹا گناہ سرزد نہ ہوا ہو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب التفسير/حدیث: 3792]