سیدنا عبداللہ بن مسعود رضی اللہ عنہ فرماتے ہیں: جب رسول اللہ صلی اللہ علیہ وسلم نے تبوک کی جانب پیش قدمی فرمائی تو کوئی نہ کوئی پیچھے رہ جاتا، تو لوگ کہتے: یا رسول اللہ صلی اللہ علیہ وسلم فلاں شخص پیچھے رہ گیا ہے، آپ علیہ السلام فرماتے: اس کو چھوڑو، اگر اس (کے نصیب) میں بھلائی ہو گی تو وہ آ کر تمہارے ساتھ شامل ہو جائے گا۔ اور اگر اس (کے تمہارے ساتھ چلنے) میں بہتری نہیں ہے تو اللہ تعالیٰ نے تمہیں اس سے بچا لیا۔ حتی کہ کسی نے کہا: یا رسول اللہ صلی اللہ علیہ وسلم ! ابوزر پیچھے رہ گئے ہیں، ان کا اونٹ ان کو دیر کروا رہا ہے۔ رسول اللہ صلی اللہ علیہ وسلم نے فرمایا: اس کو چھوڑو، اگر اس (کے تمہارے ساتھ چلنے) میں بہتری ہو گی تو وہ عنقریب تمہارے ساتھ آ ملے گا اور اگر اس میں بہتری نہ ہوئی تو اللہ تعالیٰ نے اس سے تمہیں بچا لیا، سیدنا ابوذر نے کچھ دیر تو انتظار کیا لیکن اونٹ نہ اٹھا۔ جب آپ اس سے مایوس ہو گئے تو آپ نے اپنا سامان اتار کر اپنی پیٹھ پر لادا اور پیدل ہی رسول اللہ صلی اللہ علیہ وسلم کے (قافلے کے) پیچھے پیچھے چل دئیے، رسول اللہ صلی اللہ علیہ وسلم نے ایک مقام پر پڑاؤ ڈالا۔ تو ایک صحابی رضی اللہ عنہ کی نظر پڑی، وہ کہنے لگا یا رسول اللہ صلی اللہ علیہ وسلم یہ کوئی آدمی راستے پر چلا آ رہا ہے؟ تو رسول اللہ صلی اللہ علیہ وسلم نے فرمایا: تو ابوذر ہو جا۔ جب لوگوں نے اس کو غور سے دیکھا تو بولے: یا رسول اللہ صلی اللہ علیہ وسلم ! خدا کی قسم! وہ تو واقعی ابوذر رضی اللہ عنہ ہے۔ رسول اللہ صلی اللہ علیہ وسلم نے فرمایا: اللہ تعالیٰ ابوذر رضی اللہ عنہ پر رحم کرے، یہ اکیلا ہی سفر کرتا ہے اور اکیلا ہی فوت ہو گا اور اکیلا ہی قیامت کے دن اٹھایا جائے گا۔ پھر ایک زمانہ گزر گیا اور سیدنا ابوذر رضی اللہ عنہ نے ربذہ کی جانب سفر کیا، جب ان کی وفات کا وقت قریب آیا تو انہوں نے اپنی بیوی اور غلام کو نصیحت کی کہ جب میں فوت ہو جاؤں تو مجھے غسل دے کر، کفن پہنا کر گزرگاہ میں رکھ دینا۔ جو قافلہ تمہارے پاس سے سب سے پہلے گزرے اس کو بتانا کہ یہ ابوذر رضی اللہ عنہ ہے۔ جب آپ فوت ہو گئے تو انہوں نے ان کی وصیت کے مطابق عمل کیا۔ ایک قافلہ نمودار ہوا، لیکن ان کو پتہ نہ چلا حتی کہ وہ اتنا قریب آ گئے کہ قریب تھا کہ ان کی سواریاں ان کی چارپائی کو روند ڈالتیں تو اچانک اس قافلے میں اہل کوفہ میں سے سیدنا ابن مسعود رضی اللہ عنہ موجود تھے۔ انہوں نے پوچھا: یہ کیا ہے؟انہوں نے بتایا کہ یہ ابوذر کا جنازہ ہے۔ تو سیدنا عبداللہ بن مسعود رضی اللہ عنہ کی چیخ نکل گئی اور وہ رو پڑے، اور بولے: رسول اللہ صلی اللہ علیہ وسلم نے سچ فرمایا تھا کہ اللہ تعالیٰ ابوذر پر رحم کرے، یہ تنہا سفر کرتا ہے اور اکیلا ہی فوت ہو گا اور اکیلا ہی اٹھایا جائے گا۔ پھر آپ سواری سے اترے اور بذات خود ان کی تدفین کی۔ جب وہ لوگ مدینہ میں آئے تو سیدنا عثمان رضی اللہ عنہ کو عبداللہ کی گفتگو اور ان کا وہ عمل بتایا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب المغازي والسرايا/حدیث: 4421]