سیدنا مالک بن دینار رضی اللہ عنہ فرماتے ہیں: میں نے سعید بن جبیر رضی اللہ عنہ سے پوچھا: اے ابوعبداللہ! رسول اللہ صلی اللہ علیہ وسلم کا علم بردار کون تھا؟ (سیدنا مالک بن دینار رضی اللہ عنہ) فرماتے ہیں: انہوں نے میری جانب دیکھا، اور بولے: تم بہت کمزور دل ہو، یہ بات مجھے اچھی نہ لگی، میں نے ان کے قراء ساتھیوں سے ان کی شکایت کر دی، میں نے کہا: تمہیں سعید پر حیرانی نہیں ہوتی؟ میں نے اس سے پوچھا کہ رسول اللہ صلی اللہ علیہ وسلم کا علمبردار کون تھا؟ اس نے ایک نظر مجھے دیکھا اور بولا: تو بہت کمزور دل شخص ہے۔ لوگوں نے کہا: تو نے یہ سوال تو اس سے کر لیا ہے لیکن وہ حجاج سے خوف زدہ ہے، جس کی وجہ سے وہ اپنے گھر میں پناہ گزین ہے، اب آپ (دوبارہ) اس سے یہی سوال کر کے دیکھیں۔ میں نے دوبارہ وہی سوال ان سے کیا تو وہ بولے: رسول اللہ صلی اللہ علیہ وسلم کے علم بردار سیدنا علی رضی اللہ عنہ تھے، بالکل اسی طرح میں نے سیدنا عبداللہ بن عباس رضی اللہ عنہما سے بھی سنا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا ہے۔ زنفل عرفی سے مروی کی ایک حدیث اس حدیث کی شاہد بھی موجود ہے لیکن اس میں طول بہت ہے اس لئے میں نے اس کو (یہاں) نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4716]