سیدنا علی ابن ابی طالب رضی اللہ عنہ فرماتے ہیں: جب سیدہ فاطمہ رضی اللہ عنہا کے ہاں سیدنا حسین رضی اللہ عنہ کی ولادت ہوئی تو رسول اللہ صلی اللہ علیہ وسلم تشریف لائے اور فرمایا: مجھے میرا بیٹا دکھاؤ، تم نے اس کا کیا نام رکھا ہے؟ (اس کے بعد تفصیلی حدیث بیان کی) سیدنا قتادہ کا بیان ہے کہ سیدنا حسین رضی اللہ عنہ عاشورا کے دن جمعۃ المبارک کو شہید ہوئے۔ ٭٭ امام حاکم کہتے ہیں: ان روایات کو ہم نے امام حسین کے شہادت کے بیان میں تفصیل سے نقل کر دیا ہے، سننے والے کے لئے وہی کافی ہیں۔ ٭٭ امام حاکم کہتے ہیں: امام بخاری رحمۃ اللہ علیہ اور امام مسلم رحمۃ اللہ علیہ نے اہل بیت کے فضائل کے حوالے سے جن احادیث کی تخریج نہیں کی تھی میں نے انتہائی محنت کے ساتھ ان کو جمع کیا ہے، ان میں سے یہ آخری حدیث تھی۔ یہاں تک خلفاء راشدین اور رسول اللہ صلی اللہ علیہ وسلم کے اہل بیت کے فضائل صحیح سند والی روایت کے ہمراہ ہم نے بیان کر دیئے ہیں۔ ان کے ذکر کے بعد اس کتاب کی ترتیب میں نے اس طرح رکھی ہے کہ اسلام کے آغاز سے لے کر آخری صحابی کی وفات تک تاریخ وفات کے اعتبار سے ان کا ذکر کیا ہے۔ اور اللہ تعالیٰ ہی اپنی رحمت کاملہ کے ساتھ اس پر مددگار ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4890]