محمد بن عمر بیان کرتے ہیں کہ سیدنا ابوحذیفہ رضی اللہ عنہ رسول اللہ صلی اللہ علیہ وسلم کے دارِ ارقم میں داخل ہونے سے پہلے اسلام لا چکے تھے اور وہ ان لوگوں میں سے تھے جنہوں نے (حبشہ اور مدینہ کی) دونوں ہجرتیں کی تھیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5055]

عبدالرحمن بن ابی زناد اپنے والد سے روایت کرتے ہیں کہ سیدنا ابوحذیفہ رضی اللہ عنہ غزوہ بدر میں شریک ہوئے اور انہوں نے اپنے والد عتبہ کو مقابلے کے لیے للکارا، جب انہوں نے اپنے باپ کو مبارزت کی دعوت دی تو ان کی بہن ہند بنت عتبہ نے (ان کی مذمت میں یہ اشعار) کہے: ”وہ بھینگا، سامنے کے دانتوں میں خلا والا اور بدشگون ابوحذیفہ دین کے معاملے میں بدترین انسان ہے، کیا تو نے اس باپ کا شکر ادا نہ کیا جس نے تجھے بچپن میں پالا یہاں تک کہ تو ایک کڑیل جوان بن گیا۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 5055M]