سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے غزوہ احد کے دن ایک تلوار ہاتھ میں لی جبکہ صحابہ کرام آپ کے گرد جمع تھے، آپ صلی اللہ علیہ وسلم نے فرمایا: ”یہ تلوار کون لے گا؟“ سب نے اپنے ہاتھ پھیلا دیے اور ہر کوئی عرض کرنے لگا کہ میں لوں گا، میں لوں گا، پھر آپ صلی اللہ علیہ وسلم نے فرمایا: ”کون اسے اس کے حق کے ساتھ لے گا؟“ اس پر لوگ (ذمہ داری کی سنگینی کی وجہ سے) پیچھے ہٹ گئے، تب سیدنا سماک ابو دجانہ رضی اللہ عنہ نے عرض کیا: میں اسے اس کے حق کے ساتھ لیتا ہوں، چنانچہ رسول اللہ صلی اللہ علیہ وسلم نے وہ تلوار ان کے حوالے کر دی اور انہوں نے اس دن اس کے ذریعے مشرکین کے سروں کو پاش پاش کر دیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5088]