سیدنا معقل بن یسار رضی اللہ عنہ فرماتے ہیں: سیدنا عمر بن خطاب رضی اللہ عنہ نے ہرمزان سے اصبہان، فارس اور آذربائیجان کے بارے میں مشورہ کیا، انہوں نے کہا: اے امیرالمومنین! اصبہان ”سر“ ہے اور فارس اور آذربائیجان بازو ہیں۔ اگر دو بازوؤں میں سے ایک کٹ جائے تو سر کے ساتھ دوسرا بازو کام کر سکتا ہے۔ لیکن اگر سر کو کاٹ دیا جائے تو دونوں بازو بھی بیکار ہو جاتے ہیں، اس لئے آپ اصبہان سے آغاز فرمایئے۔ سیدنا عمر بن خطاب رضی اللہ عنہ مسجد میں تشریف لائے، اس وقت نعمان بن مقرن نماز پڑھ رہے تھے، آپ ان کا انتظار کرتے رہے، جب وہ نماز سے فارغ ہوئے تو آپ نے ان سے کہا: میں تمہیں عامل بنانا چاہتا ہوں، انہوں نے کہا: ٹیکس اکٹھا کرنے کے لئے میں نہیں جاؤں گا، ہاں اگر جہاد کے لئے بھیج رہے ہیں تو میں تیار ہوں۔ سیدنا عمر رضی اللہ عنہ نے فرمایا: تمہیں جہاد کے لئے بھیجا جا رہا ہے۔ یہ سن کر وہ خوش ہو گئے۔ پھر سیدنا عمر رضی اللہ عنہ نے اہل کوفہ کی جانب پیغام بھیجا کہ ان کے ساتھ شامل ہو جائیں اور ان کی مدد کریں۔ ان میں سیدنا حذیفہ بن یمان رضی اللہ عنہ، سیدنا مغیرہ بن شعبہ رضی اللہ عنہ، سیدنا زبیر بن عوام رضی اللہ عنہ، سیدنا اشعث بن قیس رضی اللہ عنہ، سیدنا عمرو بن معدیکرب رضی اللہ عنہ اور سیدنا عبداللہ بن عمرو رضی اللہ عنہ بھی شامل تھے۔ نعمان بن مقرن رضی اللہ عنہ ان کے پاس آئے۔ ان لوگوں اور اصبہان کے درمیان ایک نہر واقع تھی، انہوں نے سیدنا مغیرہ بن شعبہ رضی اللہ عنہ کو ان کی جانب بطور سفیر روانہ فرمایا۔ ان کا بادشاه ذوالحاجبین تھا، اس نے اپنے وزراء سے مشورہ کیا کہ مجھے ان کے سامنے جنگلی انداز میں بیٹھنا چاہئے یا شاہانہ شان و شوکت کے ساتھ؟ (وزراء کے مشورے کے مطابق) وہ شاہی تاج سر پر سجا کر بادشاہوں کے رعب اور دبدبہ کے ساتھ تخت شاہی پر بیٹھ گیا، امراء اور وزراء ریشمی کپڑوں میں ملبوس، سونے کی بالیاں اور کنگن پہنے ہوئے، اس کے اردگرد کھڑے ہو گئے۔ سیدنا مغیرہ بن شعبہ رضی اللہ عنہ وہاں تشریف لائے، انہوں نے اس کو بازوؤں سے پکڑا، اس وقت ان کے ہاتھ میں نیزہ اور ڈھال تھی، لوگ ان کے اردگرد قطار اندر قطار ریشمی قالین پر کھڑے ہوئے تھے، انہوں نے اپنے نیزے کے ساتھ اس کے قالین کو کاٹ کر پھینک دیا تاکہ وہ سمجھ جائیں کہ ہم کس موڈ میں آئے ہیں۔ ذوالحاجبین نے ان سے کہا: اے عربیو! تمہیں شدید ننگ و افلاس اور تنگ دستی کا سامنا ہے اسی لئے تم لوگ اپنے وطنوں سے ہجرت کر کے آئے ہو، اگر تم چاہو تو میں تمہیں دولت سے نواز کر واپس بھیج دیتا ہوں۔ سیدنا مغیرہ بن شعبہ رضی اللہ عنہ لب کشا ہوئے، اللہ تعالیٰ کی حمد و ثناء کے بعد فرمایا: بے شک ہم عرب کے باشندے ہیں، ہم مردار کھانے والی قوم تھے لوگ آ کر ہمیں شکست دے جاتے تھے مگر ہمیں کسی کے مقابلے کی جرأت نہ ہوتی تھی، اللہ تعالیٰ نے (کرم کیا اور) ہم میں ایک رسول بھیجا جن کا تعلق ایک عالی خاندان کے ساتھ ہے، جو کہ متوسط طبقے سے تعلق رکھتے ہیں اور ہمیشہ سچی بات کہتے ہیں، اور انہوں نے ہمیں یہ خوشخبری دی ہے کہ یہ ملک ہم فتح کریں گے اور انہوں نے آج تک جتنی بھی پیشین گوئیاں کی ہیں ہم نے ان تمام کو سچ پایا ہے۔ میں یہاں پر جو سامان ضرب و حرب دیکھ رہا ہوں، میں نہیں سمجھتا کہ میں اور میرے ساتھی یہ لئے بغیر واپس جائیں گے۔ سیدنا مغیرہ بن شعبہ رضی اللہ عنہ فرماتے ہیں: میرے دل میں یہ سوچ آ رہی تھی کہ مجھے کود کر اس کے ساتھ بیٹھ جانا چاہئے، چنانچہ میں نے ان میں تھوڑی سی غفلت پائی تو وہاں سے ایک جست لگائی اور کود کر تخت شاہی پر اس کے برابر بیٹھ گیا، ان لوگوں نے مجھے ڈانٹا اور بہت جھڑکا، اور ذوالحاجبین کو اکسانے لگے۔ میں نے ان سے کہا: اگر میں نے کوئی بے وقوفی کا کام کر لیا ہے تو (اس قانون کا تو لحاظ کرو کہ) دوسرے ملک کے سفیروں کے ساتھ ایسا سلوک نہیں کیا کرتے، اور جب تمہارے سفیر ہمارے پاس آتے ہیں، ہم نے تو کبھی بھی ان کے ساتھ ایسا سلوک نہیں کیا۔ اس نے کہا: اگر چاہو تو تم ہمارے بارے میں فیصلہ کرو اور چاہو تو ہم تمہارے بارے میں فیصلہ کریں میں نے کہا: ہم تمہارا فیصلہ کریں گے، اس کے بعد ہم نے فیصلہ کر دیا ہم نے ان کے مقابلے میں صف بندی کر لی، انہوں نے سات سات اور پانچ پانچ آدمیوں کی ایک زنجیر بنا دی تاکہ کوئی بھاگ نہ سکے، پھر انہوں نے ہم پر تیروں کی بوچھاڑ کر دی، اور ہم پر جھپٹ پڑے۔ سیدنا مغیرہ نے سیدنا نعمان سے کہا: ان لوگوں نے جلد بازی میں ہم پر حملہ کر دیا ہے اس لئے اب آپ بھی حملہ کر دیں۔ انہوں نے کہا: آپ بڑی فضیلتوں والے ہیں، بے شک آپ نے رسول اللہ صلی اللہ علیہ وسلم کے ہمراہ غزوات میں شرکت بھی کی ہے۔ لیکن میں بھی حضور صلی اللہ علیہ وسلم کے ہمراہ رہا ہوں، اگر آپ صبح سویرے حملہ نہ کرتے تو پھر شام تک تاخیر کرتے، جب سورج ڈھل جاتا اور ہوائیں چلنا شروع ہو جاتیں تو حملہ کرتے اور (اللہ کے فضل و کرم سے) فتح نصیب ہوتی۔ پھر سیدنا نعمان نے کہا: اے لوگو میں تین مرتبہ جھنڈا لہراؤں گا، پہلی مرتبہ ہر شخص اپنی حاجات سے فارغ ہو لے، دوسری مرتبہ اپنے ہتھیار وغیرہ تیار کر لیں اور تیسری مرتبہ میں حملہ آور ہو جاؤں گا تو تم بھی فوراً حملہ کر دینا۔ اگر کوئی شہید ہو جائے تو دوسرا اس (کو اٹھانے) کے لئے نیچے نہ جھکے، بلکہ اگر میں بھی شہید ہو جاؤں تو مجھے اٹھانے کے لئے بھی کوئی نیچے نہ جھکے، میں اللہ کی دعوت پیش کرنے والا ہوں، میں تم میں سے ہر شخص کے لئے اس چیز کا ارادہ کرتا ہوں جس پر وہ آمین کہے گا۔ پھر انہوں نے یوں دعا مانگی ”یا اللہ! آج نعمان کو ایسی شہادت عطا فرما جو مسلمانوں کے لئے فتح و نصرت کا باعث ہو۔ لوگوں نے اس پر آمین کہا۔ پھر انہوں نے تین مرتبہ جھنڈا لہرایا اور حملہ آور ہو گئے۔ اس دن سیدنا نعمان ہی سب سے پہلے زخمی ہوئے، مجھے ان کی وصیت یاد آ گئی اور میں ان کے لئے ذرا بھی نیچے نہیں جھکا بلکہ ان کی جگہ سنبھال کر جنگ جاری رکھی۔ (اس دن حالات اس طرح ہو گئے تھے کہ) ہم ان کا ایک آدمی بھی قتل کرتے تو وہ سب اس کی طرف بھاگ پڑتے اور اس کو گھسیٹتے پھرتے۔ اسی دن ذوالحاجبین اپنی سواری سے نیچے گر پڑا، اس کا پیٹ پھٹ گیا، اور الله تعالیٰ نے مسلمانوں کو فتح عطا فرمائی۔ میں سیدنا نعمان رضی اللہ عنہ کے پاس آیا تو اس وقت ان میں ابھی زندگی کی کچھ رمق باقی تھی، میں ان کے پاس پانی لے کر آیا اور ان کے چہرے سے مٹی دھول کو صاف کیا، انہوں نے پوچھا: تم کون ہو؟ میں نے جواباً: کہا معقل بن یسار۔ انہوں نے پوچھا: لوگوں کے ساتھ کیا معاملہ پیش آیا؟ میں نے کہا: الله تعالیٰ نے فتح عطا فرمائی ہے۔ انہوں نے اللہ کا شکر ادا کیا اور کہا کہ سیدنا عمر رضی اللہ عنہ کی جانب خط لکھ دو۔ اس کے بعد ان کی روح پرواز کر گئی، لوگ سیدنا اشعث بن قیس رضی اللہ عنہ کے پاس جمع ہو گئے، وہ فرماتے ہیں ہم ان کی ”ام ولد“ (وہ لونڈی جس کو آقا نے کہہ رکھا ہو کہ میرا بچہ پیدا کرنے کے بعد تو آزاد ہے) کے پاس گئے اور ان سے پوچھا کہ کیا انہوں نے تم سے کوئی عہد لے رکھا تھا؟ انہوں نے کہا: نہیں۔ مگر ایک بریف کیس ہے اس میں ایک خط موجود ہے۔ ہم نے اس کو پڑھا، ان میں متعدد لوگوں کی شہادت کے بارے میں تفصیلات لکھی ہوئی تھیں۔ ابوعثمان نہدی فرماتے ہیں: وہ سیدنا عمر رضی اللہ عنہ کے پاس آئے، تو سیدنا عمر رضی اللہ عنہ نے سیدنا نعمان بن مقرن رضی اللہ عنہ کے بارے میں دریافت کیا تو انہوں نے بتایا کہ وہ شہید ہو گئے ہیں۔ سیدنا عمر رضی اللہ عنہ نے ”انا للہ وانا الیہ راجعون“ پڑھا۔ پھر ایک دوسرے شخص کے بارے میں بھی پوچھا تو انہوں نے بتایا کہ وہ بھی شہید ہو گئے ہیں، آپ نے مزید لوگوں کے بارے میں پوچھا تو انہوں نے کہا کہ باقی لوگوں کے بارے میں اللہ تعالیٰ ہی بہتر جانتا ہے۔ مجھے ان کے بارے میں کچھ علم نہیں ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5362]

0 [المستدرك على الصحيحين/كتاب معرفة الصحابة رضي الله تعالى عنهم/حدیث: 5362M]