سیدنا عوف بن مالک اشجعی رضی اللہ عنہ سے روایت ہے، انہوں نے کہا کہ نبی کریم صلی اللہ علیہ وسلم تشریف لے گئے اور میں بھی آپ کے ہمراہ تھا یہاں تک کہ ہم یہودیوں کے ایک عبادت خانے میں داخل ہوئے، تو آپ صلی اللہ علیہ وسلم نے فرمایا: ”اے گروہِ یہود! مجھے ایسے بارہ آدمی دکھا دو جو اس بات کی گواہی دیں کہ اللہ کے سوا کوئی معبود نہیں اور محمد اللہ کے رسول ہیں، تو اللہ تعالیٰ آسمان کے نیچے موجود ہر یہودی سے وہ غضب ختم کر دے گا جو اس پر ہوا ہے۔“ راوی کہتے ہیں کہ وہ سب خاموش رہے اور ان میں سے کسی نے جواب نہ دیا، پھر آپ صلی اللہ علیہ وسلم نے دوبارہ اپنی بات دہرائی لیکن کسی نے جواب نہ دیا، تو آپ صلی اللہ علیہ وسلم نے فرمایا: ”تم نے انکار کر دیا؟! تو اللہ کی قسم! میں ہی حاشر (لوگوں کو جمع کرنے والا) ہوں، میں ہی عاقب (سب کے بعد آنے والا) ہوں، اور میں ہی اللہ کا چیدہ و منتخب نبی ہوں، خواہ تم ایمان لاؤ یا جھٹلاؤ۔“ پھر آپ صلی اللہ علیہ وسلم واپس مڑ گئے اور میں بھی آپ کے ساتھ تھا یہاں تک کہ جب ہم باہر نکلنے ہی والے تھے تو اچانک ہمارے پیچھے سے ایک شخص نے آواز دی کہ اے محمد! آپ ذرا ٹھہرئیے، پھر وہ شخص آگے بڑھا اور (یہودیوں سے مخاطب ہو کر) کہنے لگا: ”اے گروہِ یہود! تم میرے متعلق اپنے اندر کیا جانتے ہو؟“ انہوں نے کہا: ”اللہ کی قسم! ہم نہیں جانتے کہ ہم میں کوئی شخص آپ سے بڑھ کر اللہ کی کتاب کا عالم ہو، اور نہ ہی آپ سے بڑھ کر کوئی فقیہ ہے، نہ آپ سے پہلے آپ کا باپ اور نہ آپ کے باپ سے پہلے آپ کا دادا ایسا تھا۔“ اس پر اس شخص نے کہا: ”تو میں اللہ کو گواہ بنا کر اس بات کی گواہی دیتا ہوں کہ بلاشبہ یہ اللہ کے وہی نبی ہیں جنہیں تم تورات میں لکھا ہوا پاتے ہو۔“ یہ سن کر وہ یہودی کہنے لگے: ”تم نے جھوٹ بولا“، پھر انہوں نے اس کی بات رد کر دی اور ان کے متعلق نازیبا کلمات کہے، تو رسول اللہ صلی اللہ علیہ وسلم نے فرمایا: ”تم نے جھوٹ بولا ہے، اب تمہاری بات قبول نہیں کی جائے گی، ابھی تھوڑی دیر پہلے تو تم ان کی اتنی خیر و بھلائی کے ساتھ تعریف کر رہے تھے اور اب جبکہ وہ ایمان لے آئے ہیں تو تم انہیں جھٹلا رہے ہو اور ان کے بارے میں جو جی میں آئے کہہ رہے ہو؛ لہذا تمہاری بات ہرگز تسلیم نہیں کی جائے گی۔“ راوی کہتے ہیں کہ پھر ہم وہاں سے نکلے تو ہم تین افراد تھے: رسول اللہ صلی اللہ علیہ وسلم ، میں اور عبداللہ بن سلام، اور اللہ تعالیٰ نے ان کے بارے میں یہ آیت نازل فرمائی: ﴿قُلْ أَرَأَيْتُمْ إِنْ كَانَ مِنْ عِنْدِ اللَّهِ وَكَفَرْتُمْ بِهِ﴾ [سورة الأحقاف: 10] ”آپ کہہ دیجیے کہ بھلا یہ تو بتاؤ کہ اگر یہ (قرآن) اللہ ہی کی طرف سے ہوا اور تم نے اس کا انکار کر دیا (تو تمہارا کیا حال ہوگا)؟“
یہ حدیث امام بخاری اور امام مسلم کی شرط پر صحیح ہے لیکن ان دونوں نے اسے روایت نہیں کیا، شیخین کا اتفاق صرف حمید کی سیدنا انس رضی اللہ عنہ سے مروی روایت پر ہے جس میں ”تمہارے درمیان عبداللہ بن سلام کا کیا مقام ہے؟“ کے الفاظ اختصار کے ساتھ مذکور ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5865]