سیدنا نافع بن عتبہ فرماتے ہیں: عرب کے کچھ لوگ رسول اللہ صلی اللہ علیہ وسلم کی بارگاہ میں اسلام قبول کرنے کے لئے آئے، انہوں نے اون کے کپڑے پہنے ہوئے تھے، میں یہ سوچ کر کہ ان کے اور رسول اللہ صلی اللہ علیہ وسلم کے درمیان حائل ہو جاؤں، اٹھ کر کھڑا ہوا، پھر میرے دل میں خیال آیا کہ آپ تو قوم کے نجات دہندہ ہیں۔ (اس لئے آپ کو کوئی کچھ نہیں کہہ سکتا) لیکن پھر میرے دل نے مجبور کیا اور میں آپ صلی اللہ علیہ وسلم کے قریب آ کر کھڑا ہو گیا۔ میں نے اس وقت سنا، رسول اللہ صلی اللہ علیہ وسلم فرما رہے تھے: جزیرہ عرب کے ساتھ جنگ ہو گی اور اللہ تعالیٰ ہمیں فتح و نصرت سے ہمکنار کرے گا، پھر ایران سے جنگ ہو گی، اس میں بھی اللہ پاک ہمیں فتح دے گا، پھر دجال کے ساتھ جنگ ہو گی، اللہ پاک اس پر بھی فتح دے گا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5934]