مصعب بن عبداللہ سے روایت ہے کہ انہوں نے سیدنا حکیم بن حزام رضی اللہ عنہ کا نسب ذکر کیا اور اس میں یہ اضافہ کیا کہ ان کی والدہ فاختہ بنت زہیر بن اسد بن عبدالعزیٰ تھیں، انہوں نے حکیم کو خانہ کعبہ کے اندر جنم دیا تھا، وہ حاملہ تھیں کہ کعبہ کے اندر ہی انہیں دردِ زہ ہوا اور وہیں ولادت ہوئی، انہیں چمڑے کے ایک بستر پر اٹھا کر باہر لایا گیا اور ان کے نیچے والے کپڑوں کو زمزم کے حوض کے پاس دھویا گیا، ان سے پہلے یا ان کے بعد کعبہ میں کوئی پیدا نہیں ہوا۔ مصعب سے آخری بات میں چوک ہوئی ہے کیونکہ یہ خبریں حدِ تواتر کو پہنچی ہوئی ہیں کہ سیدہ فاطمہ بنت اسد رضی اللہ عنہا نے امیر المومنین سیدنا علی بن ابی طالب کرم اللہ وجہہ کو خانہ کعبہ کے اندر جنم دیا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6159]