سیدنا سعد بن ابی وقاص رضی اللہ عنہ فرماتے ہیں کہ فرضیت نماز سے پہلے میں نے اسلام قبول کر لیا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6231]

محمد بن عمر کہتے ہیں: سیدنا سعد بن ابی وقاص رضی اللہ عنہ رسول اللہ صلی اللہ علیہ وسلم کے ہمراہ جنگ بدر میں شریک ہوئے اور احد میں جب لوگوں میں بھگدڑ مچ گئی تھی اس وقت یہ رسول اللہ صلی اللہ علیہ وسلم کے ہمراہ ثابت قدم رہے تھے، آپ نے جنگ خندق، غزوہ خیبر، فتح مکہ اور تمام غزوات میں رسول اللہ صلی اللہ علیہ وسلم کے ہمراہ شرکت کی ہے۔ فتح مکہ کے موقع پر مسلمانوں کے تین جھنڈوں میں سے ایک ان کے ہاتھ میں تھا۔ اور آپ رسول اللہ صلی اللہ علیہ وسلم کے تیر اندازوں میں بھی تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6231M]