سیدنا ابو ہریرہ دوسی رضی اللہ عنہ کے فضائل کا ذکر، ان کے اور ان کے والد کے نام میں بہت اختلاف پایا جاتا ہے۔ سیدنا ابو ہریرہ رضی اللہ عنہ سے مروی ہے کہ انہوں نے فرمایا: ”زمانہ جاہلیت میں میرا نام عبد شمس بن صخر تھا، پھر اسلام لانے پر میرا نام عبدالرحمن رکھا گیا، اور میری کنیت ابو ہریرہ اس وجہ سے پڑی کہ میں اپنے گھر والوں کی بکریاں چرایا کرتا تھا، مجھے جنگلی بلی کے بچے ملے تو میں نے انہیں اپنی آستین میں ڈال لیا، جب میں واپس پلٹا اور میری گود سے بلی کے بچوں کی آوازیں سنی گئیں تو لوگوں نے پوچھا کہ اے عبد شمس! یہ کیا ہے؟ میں نے کہا کہ یہ بلی کے بچے ہیں جو مجھے ملے ہیں، انہوں نے کہا کہ پھر تو تم ”ابو ہریرہ“ ہو، چنانچہ اس کے بعد یہ کنیت مجھ پر لازم ہو گئی۔“ ابن اسحاق کہتے ہیں کہ سیدنا ابو ہریرہ رضی اللہ عنہ قبیلہ دوس میں بہت معزز مقام رکھتے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6265]