سیدنا عبداللہ بن عباس رضی اللہ عنہما سے روایت ہے، انہوں نے کہا کہ مجھے میرے والد (سیدنا عباس رضی اللہ عنہ) نے حکم دیا کہ ایک رات رسول اللہ صلی اللہ علیہ وسلم کے پاس گزارو، پس میں مسجد گیا، رسول اللہ صلی اللہ علیہ وسلم نے عشاء کی نماز پڑھی یہاں تک کہ مسجد میں آپ صلی اللہ علیہ وسلم کے سوا کوئی باقی نہ رہا، پھر آپ صلی اللہ علیہ وسلم میرے پاس سے گزرے تو پوچھا: ”یہ کون ہے؟“ میں نے عرض کیا: عبداللہ، آپ صلی اللہ علیہ وسلم نے پوچھا: ”کیا بات ہے؟“ میں نے عرض کیا: میرے والد نے مجھے حکم دیا تھا کہ میں آج کی رات آپ کے پاس گزاروں، آپ صلی اللہ علیہ وسلم نے فرمایا: ”پھر میرے ساتھ چلو“، جب آپ صلی اللہ علیہ وسلم گھر میں داخل ہوئے تو فرمایا: ”عبداللہ کے لیے بستر بچھا دو“، چنانچہ میرے لیے بالوں سے بنا ایک تکیہ لایا گیا، اور عباس رضی اللہ عنہ نے مجھے تاکید کی تھی کہ تم نے سونا نہیں یہاں تک کہ آپ صلی اللہ علیہ وسلم کی نماز (کا طریقہ) یاد کر لو، پس رسول اللہ صلی اللہ علیہ وسلم لیٹ گئے اور سو گئے یہاں تک کہ میں نے آپ صلی اللہ علیہ وسلم کے خراٹوں کی آواز سنی، پھر آپ صلی اللہ علیہ وسلم اپنے بستر پر سیدھے ہوئے اور اپنا سر آسمان کی طرف اٹھا کر تین بار فرمایا: «سبحان الملك القدوس» ”پاک ہے وہ بادشاہ جو نہایت مقدس ہے“، پھر آپ صلی اللہ علیہ وسلم نے سورہ آل عمران کی آخری آیات ﴿إِنَّ فِي خَلْقِ السَّمَاوَاتِ وَالْأَرْضِ﴾ [سورة آل عمران: 190] سے لے کر سورت کے اختتام تک تلاوت فرمائی، پھر آپ صلی اللہ علیہ وسلم اٹھے اور قضائے حاجت کی، پھر مسواک کی اور وضو فرمایا، پھر اپنی جائے نماز پر تشریف لائے اور دو رکعتیں پڑھیں جو نہ بہت مختصر تھیں اور نہ بہت طویل، پھر آپ صلی اللہ علیہ وسلم نے نماز پڑھی اور وتر ادا کیے، جب آپ صلی اللہ علیہ وسلم اپنی نماز مکمل کر چکے تو میں نے آپ صلی اللہ علیہ وسلم کو یہ دعا کرتے ہوئے سنا: «اللَّهُمَّ اجْعَلْ فِي بَصَرِي نُورًا، وَاجْعَلْ فِي سَمْعِي نُورًا، وَاجْعَلْ فِي لِسَانِي نُورًا، وَاجْعَلْ فِي قَلْبِي نُورًا، وَاجْعَلْ عَنْ يَمِينِي نُورًا، وَاجْعَلْ عَنْ شِمَالِي نُورًا، وَاجْعَلْ أَمَامِي نُورًا، وَاجْعَلْ مِنْ خَلْفِي نُورًا، وَاجْعَلْ مِنْ فَوْقِي نُورًا، وَاجْعَلْ مِنْ أَسْفَلَ مِنِّي نُورًا، وَاجْعَلْ لِي يَوْمَ أَلْقَاكَ نُورًا، وَأَعْظِمْ لِي نُورًا» ”اے اللہ! میری بصارت میں نور پیدا کر دے، میری سماعت میں نور پیدا کر دے، میری زبان میں نور پیدا کر دے، میرے دل میں نور پیدا کر دے، میرے دائیں جانب نور پیدا کر دے، میرے بائیں جانب نور پیدا کر دے، میرے سامنے نور پیدا کر دے، میرے پیچھے نور پیدا کر دے، میرے اوپر نور پیدا کر دے، میرے نیچے نور پیدا کر دے، اور جس دن میں تجھ سے ملوں اس دن میرے لیے نور بنا دے اور میرے نور کو عظیم کر دے۔“
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6419]