محارب بن دثار نے عطاء بن سائب سے پوچھا کہ کیا تم نے سعید بن جبیر کو سیدنا ابن عباس رضی اللہ عنہما کے حوالے سے کوثر کے متعلق کچھ بیان کرتے سنا ہے؟ میں نے کہا: جی ہاں، انہوں نے بتایا کہ اس سے مراد ”خیرِ کثیر“ یعنی بہت زیادہ بھلائی ہے، اس پر انہوں نے کہا: سبحان اللہ، ابن عباس کی کوئی بات شاذ و نادر ہی خطا ہوتی ہے، وہ کہتے ہیں کہ میں نے سیدنا ابن عمر رضی اللہ عنہما کو یہ کہتے سنا کہ جب آیت ﴿إِنَّا أَعْطَيْنَاكَ الْكَوْثَرَ﴾ [سورة الكوثر: 1] نازل ہوئی تو رسول اللہ صلی اللہ علیہ وسلم نے فرمایا: ”وہ جنت میں ایک نہر ہے جس کے دونوں کنارے سونے کے ہیں، وہ موتیوں اور یاقوت کے اوپر بہتی ہے، اس کا پانی دودھ سے زیادہ سفید اور شہد سے زیادہ میٹھا ہے۔“ تب انہوں نے کہا: اللہ کی قسم! ابن عباس نے سچ کہا، یہی تو اصل میں ”خیرِ کثیر“ ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6441]