ابن ابی ملیکہ سے مروی ہے کہ سیدنا عمر بن خطاب رضی اللہ عنہ نے یہ آیت تلاوت فرمائی: ﴿أَيَوَدُّ أَحَدُكُمْ أَنْ تَكُونَ لَهُ جَنَّةٌ مِنْ نَخِيلٍ وَأَعْنَابٍ تَجْرِي مِنْ تَحْتِهَا الْأَنْهَارُ لَهُ فِيهَا مِنْ كُلِّ الثَّمَرَاتِ﴾ یہاں تک ﴿فَأَصَابَهَا إِعْصَارٌ فِيهِ نَارٌ فَاحْتَرَقَتْ﴾ [سورة البقرة: 266] پھر لوگوں سے اس کے متعلق دریافت کیا اور پوچھا: ”تمہاری کیا رائے ہے کہ یہ آیت ﴿أَيَوَدُّ أَحَدُكُمْ أَنْ تَكُونَ لَهُ جَنَّةٌ﴾ کس بارے میں نازل ہوئی؟“ لوگوں نے عرض کیا: ”اللہ اور اس کا رسول بہتر جانتے ہیں،“ تو سیدنا عمر رضی اللہ عنہ غصے میں آ گئے اور فرمایا: ”یا تو کہو کہ ہم جانتے ہیں یا کہو کہ نہیں جانتے،“ اس پر سیدنا ابن عباس رضی اللہ عنہما نے عرض کیا: ”اے امیر المومنین! میرے دل میں اس کے متعلق ایک بات ہے،“ انہوں نے فرمایا: ”اے میرے بھتیجے! کہو اور اپنے آپ کو حقیر نہ سمجھو،“ ابن عباس رضی اللہ عنہما نے عرض کیا: ”یہ عمل کی ایک مثال بیان کی گئی ہے،“ تو سیدنا عمر رضی اللہ عنہ نے (وضاحت کرتے ہوئے) فرمایا: ”ایک غنی شخص جو نیک اعمال کرتا ہے، پھر اللہ اس پر شیطانوں کو مسلط کر دیتا ہے تو وہ گناہوں کے کام کرنے لگتا ہے یہاں تک کہ وہ اپنے تمام اعمال کو غرق کر دیتا ہے، اس کی مثال اس باغ جیسی ہے جو اس وقت جل کر راکھ ہو جائے جب اسے اس کی سب سے زیادہ ضرورت ہو یعنی جب وہ خود بوڑھا ہو جائے اور اس کے بچے بھی زیادہ ہوں (اور کمزور ہوں)۔“ پھر فرمایا: ”کیا تم میں سے کوئی یہ پسند کرے گا کہ وہ قیامت کے دن اس حال میں آئے کہ وہ اپنے عمل کا سب سے زیادہ محتاج ہو اور اسے وہاں کچھ بھی نہ ملے؟“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6440]