ہشام بن محمد کلبی بیان کرتے ہیں کہ جب زکوٰۃ کا حکم نازل ہوا تو رسول اللہ صلی اللہ علیہ وسلم نے سیدنا ابوبکر صدیق رضی اللہ عنہ کو سیدنا عوف بن مالک اشجعی رضی اللہ عنہ کی طرف بھیجا، ابوبکر نے عوف سے کہا: ”بے شک اللہ تعالیٰ نے صدقہ (زکوٰۃ) کا حکم نازل فرمایا ہے،“ انہوں نے پوچھا: ”صدقہ کیا ہے؟“ انہوں نے کہا: ”ہر چالیس اونٹوں میں سے ایک اونٹ،“ عوف نے کہا: ”آپ ان اونٹوں میں سے اپنی پسند کا کوئی بھی اونٹ لے لیں،“ ابوبکر رضی اللہ عنہ نے ایک اونٹ کا انتخاب کیا جو ان کے کجاوے (سفر) کے لیے موزوں تھا، عوف نے کہا: ”یہ تو میرے کجاوے والا اونٹ ہے (یعنی نہایت قیمتی ہے)“ تو ابوبکر رضی اللہ عنہ نے فرمایا: ”یہ تمہارے اجر کی زیادتی کے لیے زیادہ بہتر ہے،“ عوف نے کہا: ”تو پھر اس کا بچہ بھی ساتھ لے جائیں،“ چنانچہ ابوبکر رضی اللہ عنہ وہ اونٹ اور اس کا بچہ رسول اللہ صلی اللہ علیہ وسلم کی خدمت میں لے آئے اور عوف کا سارا طرزِ عمل بیان کیا، تو رسول اللہ صلی اللہ علیہ وسلم نے فرمایا: ”ان کے پاس واپس جاؤ اور انہیں خوشخبری سنا دو کہ اللہ نے ان کے لیے جنت میں ایک محل تعمیر کر دیا ہے۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 6458]