سیدنا عقیل بن ابی طالب رضی اللہ عنہ سے روایت ہے کہ قریش ابوطالب کے پاس آئے اور کہا: آپ کا بھتیجا ہمیں ہماری محفلوں اور مجلسوں میں تکلیف پہنچاتا ہے، اسے ہمیں ایذا دینے سے روکیں، تو انہوں نے مجھ سے فرمایا: اے عقیل! محمد صلی اللہ علیہ وسلم کو بلا لاؤ، وہ کہتے ہیں کہ میں آپ کے پاس گیا اور آپ کو ایک چھوٹے سے گھر سے نکالا، آپ صلی اللہ علیہ وسلم دوپہر کے وقت شدید گرمی میں تشریف لائے اور تپتی زمین کی تپش کی وجہ سے سائے کی تلاش میں چل رہے تھے، جب ہم ان لوگوں کے پاس پہنچے تو ابوطالب نے کہا: تمہارے چچا زاد بھائیوں کا دعویٰ ہے کہ تم انہیں ان کی محفلوں اور مجلسوں میں تکلیف پہنچاتے ہو، لہٰذا اس سے باز آ جاؤ، تو رسول اللہ صلی اللہ علیہ وسلم نے اپنی نظر آسمان کی طرف اٹھائی اور فرمایا: ”کیا تم اس سورج کو دیکھ رہے ہو؟“ انہوں نے کہا: جی ہاں، آپ صلی اللہ علیہ وسلم نے فرمایا: ”میں اس کام کو چھوڑنے پر اس سے زیادہ قدرت نہیں رکھتا جتنا تم اس بات پر کہ تم اس سورج سے آگ کا ایک شعلہ روشن کر لو،“ ابوطالب نے (قریش سے) کہا: میرے بھتیجے نے کبھی جھوٹ نہیں بولا، لہٰذا تم واپس چلے جاؤ۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6610]