حجاج بن ذی رقیبہ بن عبدالرحمن بن کعب بن زہیر بن ابی سلمی المزنی اپنے والد سے، وہ ان کے دادا سے روایت کرتے ہیں، فرماتے ہیں کہ زہیر کے دونوں بیٹے کعب اور بجیر نکلے اور ابرق العزاف کے پاس پہنچے، بجیر نے کعب سے کہا: تم اس جگہ ٹھہر کر بکریوں کی نگہبانی کرو، میں اس شخص یعنی رسول کریم صلی اللہ علیہ وسلم کے پاس جاتا ہوں اور اس کی تعلیمات سن کر آتا ہوں چنانچہ کعب وہیں ٹھہر گئے اور بجیر آگے چلے گئے، رسول اللہ صلی اللہ علیہ وسلم تشریف لائے، آپ صلی اللہ علیہ وسلم نے ان کو اسلام کی دعوت دی، انہوں نے اسلام قبول کر لیا۔ اس بات کی خبر کعب تک پہنچی تو اس نے کہا: * اے قاصد بجیر کو میرا یہ پیغام دے کہ کس وجہ سے تو نے غیر کا دین اختیار کیا، وہ دین جس پر نہ تو نے اپنے ماں باپ کو دیکھا نہ بہن بھائیوں کو، ابوبکر نے تجھے بہت بری تعلیم دی ہے، جس سے تو ہلاکت میں پڑ گیا ہے۔ جب ان اشعار کی اطلاع رسول اللہ صلی اللہ علیہ وسلم کی بارگاہ میں پہنچی تو آپ صلی اللہ علیہ وسلم نے اس کا خون مباح کر دیا اور فرمایا: جو شخص بھی کعب کو پائے وہ اس کو قتل کر دے، بجیر نے اپنے بھائی کعب کی جانب ایک خط لکھا جس کا مضمون یہ تھا ” رسول اللہ صلی اللہ علیہ وسلم نے تیرا خون جائز کر دیا، اور اس کو تنبیہ کرتے ہوئے کہا کہ اب اپنا بچاؤ کر لو، لیکن میں دیکھ رہا ہوں کہ تم بچ نہیں پاؤ گے۔ امابعد جو شخص بھی رسول اللہ صلی اللہ علیہ وسلم کے پاس آ کر اس بات کی گواہی دے دے کہ اللہ تعالیٰ کے سوا کوئی عبادت کے لائق نہیں ہے اور محمد صلی اللہ علیہ وسلم اللہ تعالیٰ کے رسول ہیں، آپ اس کی گواہی کو قبول کر لیتے ہیں، اس لئے جیسے ہی میرا یہ خط تم تک پہنچے، تم فوراً اسلام قبول کر لو، یہاں چلے آؤ، چنانچہ سیدنا کعب نے بھی اسلام قبول کر لیا، اور رسول اللہ صلی اللہ علیہ وسلم کی مدح میں ایک قصیدہ بھی لکھا، پھر وہ وہاں سے چلے اور مدینہ منورہ میں آ گئے، مسجد نبوی کے باہر اپنا اونٹ باندھا اور مسجد کے اندر آ گئے، اس وقت رسول اللہ صلی اللہ علیہ وسلم اپنے صحابہ کے درمیان دسترخوان پر بیٹھے تھے، تمام صحابہ کرام حلقہ در حلقہ بیٹھے ہوئے تھے، آپ صلی اللہ علیہ وسلم کبھی ایک حلقہ کی جانب متوجہ ہو کر ان سے گفتگو فرماتے اور کبھی دوسرے حلقہ کی جانب متوجہ ہو کر ان سے گفتگو فرماتے، آپ صلی اللہ علیہ وسلم کے اس انداز سے میں سمجھ گیا کہ یہی رسول اللہ صلی اللہ علیہ وسلم ہیں، میں کھسکتا ہوا رسول اللہ صلی اللہ علیہ وسلم کے قریب پہنچ گیا، میں نے اپنا اسلام ظاہر کیا اور عرض کی: میں گواہی دیتا ہوں کہ اللہ تعالیٰ کے سوا کوئی عبادت کے لائق نہیں ہے اور بے شک آپ اللہ تعالیٰ کے رسول ہیں۔ یا رسول اللہ صلی اللہ علیہ وسلم مجھے امان عطا فرمائیے، آپ صلی اللہ علیہ وسلم نے پوچھا: تم کون ہو؟ میں نے عرض کی: میں کعب بن زہیر ہوں۔ آپ صلی اللہ علیہ وسلم نے فرمایا: تمہی ہو جس نے فلاں فلاں اشعار کہے ہیں؟ پھر حضور صلی اللہ علیہ وسلم سیدنا ابوبکر رضی اللہ عنہ کی جانب متوجہ ہوئے اور فرمایا: اے ابوبکر اس نے کون سا شعر کہا ہے؟ سیدنا ابوبکر رضی اللہ عنہ نے یہ شعر پڑھ کر سنایا: سَقَاكَ أَبُو بَكْرٍ بِكَأْسٍ رَوِيَّةٍ ... وَانْهَلَكَ الْمَأْمُورُ مِنْهَا وَعَلَّكَا کعب رضی اللہ عنہ نے کہا: یا رسول اللہ صلی اللہ علیہ وسلم میں نے یہ الفاظ تو نہیں کہے۔ آپ صلی اللہ علیہ وسلم نے فرمایا: تو پھر کون سے اشعار کہے ہیں تو نے؟ کعب رضی اللہ عنہ نے کہا: حضور! میں نے تو یہ اشعار کہے ہیں۔ سَقَاكَ أَبُو بَكْرٍ بِكَأْسٍ رَوِيَّةً ... وَأَنْهَلَكَ الْمَأْمُونُ مِنْهَا وَعَلَّكَا، تو رسول اللہ صلی اللہ علیہ وسلم نے فرمایا: اللہ کی قسم! تو امان میں ہے۔ اس کے بعد کعب رضی اللہ عنہ نے پورا قصیدہ سنایا، اس کے آخر میں یہ اشعار تھے، یہ قصیدہ حجاج بن ذی رقیبہ کو املاء کروایا، وہ قصیدہ یہ ہے: * ” سعاد بچھڑ گئی اور میرا دل آج خستہ حال ہے جو اس کے قدموں کے نشانوں کے پیچھے پھرتا ہے اور ایک ایسے قیدی کی مانند ہے جس کا فدیہ نہ دیا گیا ہو۔ * جدائی کی صبح جب ان لوگوں نے کوچ کیا اور وقت سعاد ایک ہرنی کی مانند تھی جس نے نگاہیں جھکائی ہوئی تھیں اور اس کی آنکھیں سرمگیں تھیں۔ * جب وہ مسکراتی تھی تو چمکدار دانتوں والے رخسار یوں چمکا دیتی تھی جیسے وہ پہلی مرتبہ اور دوسری مرتبہ پلایا گیا مشروب ہو۔ * ایک ایسا مشروب جس میں وادی کے کنارے سے آنے والے پانی کو ملا دیا گیا ہو، وہ پانی جو صاف ہو، کھلی وادی کا ہو، صبح کے وقت لیا گیا ہو اور اس پر شمال کی طرف سے آنے والی ہوا گزر چکی ہو۔ * ہواؤں نے خس و خاشاک کی اس پانی سے دور کر دیا ہو اور سفید بادل کی بارش نے اس میں سفید بلبلے بنا دیے ہوں۔ * وہ محبوبہ کتنی اچھی ہوتی اگر وہ اپنے وعدے کو پورا کر دیتی یا پھر عذر ہی قبول کر لیتی لیکن وہ تو ایسی محبوبہ ہے کہ اس کے خون میں فرقت کا درد، جھوٹ، وعدہ خلافی اور تبدیلی رچے بسے ہوئے ہیں۔ * اسی لیے وہ کسی ایک حالت پر باقی نہیں رہتی ہے اور یوں بدلتی ہے جیسے غول رنگ بدلتا ہے۔ * اس نے جو عہد کیا ہوتا ہے اسے مضبوطی سے نہیں تھامتی ہے بلکہ یوں پکڑتی ہے جیسے چھلنی پانی کو پکڑتی ہے۔ * عرقوب (عہد شکنی میں ضرب المثل شخص) کے وعدوں کی مانند اس محبوبہ کے وعدے ہوتے ہیں اور اس کے وعدے صرف جھوٹے ہوتے ہیں۔ * تو وہ جو مہربانی کرے اور جو وعدہ کرے وہ تمہیں کسی غلط فہمی کا شکار نہ کرے کیونکہ یہ آرزوئیں اور یہ خواب صرف گمراہ کرتے ہیں۔ * مجھے یہ امید ہے اور مجھے یہ آس ہے کہ اس کی محبت قریب ہو جائے گی اور مجھے تیری عنایات کی اپنے لیے کوئی پرواہ نہیں ہے۔ * سعاد شام کے وقت ایسی جگہ پہنچ گئی جہاں صرف عمدہ نسل کا تیز رفتار اونٹ پہنچا سکتا ہے۔ * اس تک صرف کوئی مضبوط اونٹنی ہی پہنچا سکتی ہے جو تھکاوٹ کے باوجود رفتار کم نہیں ہونے دیتی۔ * ایسی اونٹنی کہ جب اسے پسینہ آئے تو وہ کان کے پیچھے والے حصے کو پسینے میں شرابور کر دے لیکن اس کا قصد انجانے راستوں اور مٹے ہوئے نشانات کی طرف ہو۔ * (اس اونٹنی کا جسم اتنا چکنا ہو) کہ اگر کوئی جوں اس پر چلے تو وہ جسم اسے پھسلا کر گرا دے اس اونٹنی کا سینہ اور پہلو ہموار اور چکنے ہوں۔ * اس کی مثال ایک ایسی نیل گائے کی مانند ہو جس سے گوشت کو دور کر دیا گیا ہو اور اس کی کہنیاں اس کی پسلیوں سے دور ہٹی ہوئی ہوں۔ * گویا کہ اس اونٹنی کی لکیر والی جگہ (یعنی ناک اور نیچے والے جبڑے) سے اس کی دو آنکھوں اور اس کے ذبح کی جگہ (یعنی حلق) ایک مستطیل لمبے پتھر کی مانند ہوں۔ * وہ اونٹنی کھجور کے تنے جیسی دم، جو بالوں والی ہے، اسے اپنے تھوڑے دودھ والے پستانوں پر پھیرتی ہے۔ * اس کی ناک خمدار ہے اور جو شخص (اونٹنی کی خوبی) سے آگاہ ہو اس کے لیے اس اونٹنی کے دونوں کانوں میں اصیل پن واضح ہو گا اور دونوں رخساروں میں لطافت واضح ہو گی۔ * وہ تیز تیز چلتی ہے، ہلکے پاؤں پر اور وہ جا کر مل جاتی ہے (اپنے سے آگے نکلی ہوئی اونٹنیوں سے) اور اس کی خشک ٹانگیں چھوٹے نیزوں کی مانند ہیں جو قسم پوری کرنے کے لیے زمین کو چھوتی ہیں۔ * گویا وہ موڑتی ہے اپنے آگے والے دو پاؤں، ان کے پسینہ ہو جانے کے بعد اور اس وقت چھوٹی پہاڑیاں اور سطح مرتفع سراب کی شکل اختیار کر چکی ہوتی ہیں۔ * (وہ سفر کرتی رہتی ہے) ایک ایسے دن میں جو گرم ہو اور اس دن میں گرگٹ بھی جلتا ہوا محسوس ہوتا ہو اور اس اونٹنی کے جسم کے دھوپ کے سامنے آنے والے حصے گویا ریت میں بھنی ہوئی روٹی کے مانند ہوتے ہیں۔ * وہ بہت زیادہ نوحہ کرنے والی ہے اور ڈھلیے بازوؤں والی ہے جب اس کے اکلوتے بیٹے کی موت کی خبر کسی نے اسے دی تو اس کے حوش و حواس رخصت ہو گئے۔ * چغل خور اس کے دونوں طرف گھوتے پھرتے ہیں اور اس سے چغلیاں کرتے ہیں، اور وہ یہ کہتے ہیں: اے ابوسلمہ کے بیٹے! تو مارا جائے گا۔ * اس کے آگے کا راستہ چھوڑ دو تمہارا باپ نہ رہے، رحمن (یعنی اللہ تعالیٰ) نے جو مقدر میں لکھ دیا ہے، وہ ہو کر رہے گا۔ * ہر مؤنث کا بیٹا خواہ وہ کتنے ہی طویل عرصے تک سلامت رہے، اسے ایک نہ ایک دن میت کے تختے پر ضرور اٹھایا جاتا ہے۔ * مجھے یہ بتایا گیا ہے کہ اللہ کے رسول نے میرے بارے میں وعید سنائی ہے حالانکہ اللہ کے رسول سے معافی کی توقع ہی کی جا سکتی ہے۔ * اسی لیے میں عذر پیش کرتے ہوئے اللہ کے رسول کی خدمت میں حاضر ہوا ہوں اور اللہ کے رسول کی بارگاہ میں عذر قبول کیا جاتا ہے۔ * اے رسول! آپ میرے بارے میں نرمی سے کام لیجیے وہ رسول جسے اس ذات نے بھیجا ہے، جس نے آپ کو قرآن عطا کیا ہے۔ جس میں وعظ و نصیحت اور تفصیلات ہیں۔ * آپ میرے بارے میں چغل خوروں کے اقوال قبول نہ کریں، اگرچہ میرے بارے میں بہت سی باتیں کہی گئی ہیں لیکن میں نے کوئی گناہ نہیں کیا ہے۔ * میں ایک ایسی جگہ کھڑا ہوں اور وہ کچھ دیکھ اور سن رہا ہوں کہ اگر ہاتھی اسے سن لیتا۔ * تو وہ بھی کانپنے لگتا البتہ اگر اسے رسول کی طرف سے اللہ کے حکم کے تحت معافی مل جاتی تو (اس کا خوف ختم ہو جاتا) * یہاں تک کہ میں نے اپنا دایاں ہاتھ رکھ دیا ہے (یعنی اسلام قبول کر لیا ہے) اس ذات کی ہتھیلی پر جو (بے دینوں سے) بدلہ لینے والی ہے اور جن کی بات ہی سچی بات ہے۔ * ” آپ میرے نزدیک اس وقت زیادہ با رعب تھے جب میں نے آپ کے ساتھ بات چیت شروع کی اور کہا یہ گیا تھا کہ تمہاری طرف (جرائم) منسوب کیے گئے ہیں اور تم سے حساب لیا جائے گا “۔ * (تو آپ میرے نزدیک) کچھار کے شیر سے زیادہ (با رعب تھے) جو عثر کے مقام پر رہتے ہیں اور ان کے اردگرد درختوں کے جھنڈ ہوتے ہیں۔ * وہ شیر صبح کے وقت اپنے بچوں کو گوشت کھلاتا ہے، اور ان کا گزارہ ہی لوگوں کے گوشت پر ہوتا ہے جو مٹی میں لتھڑا ہوا ہو اور ٹکڑوں کی شکل میں ہو۔ اس شیر سے نیل گائے (جیسے طاقتور جانور بھی) دبکے رہتے ہیں۔ اور پیدل لوگ اس شیر کی وادی سے گزر بھی نہیں سکتے ہیں۔ * اور اس شیر کی وادی میں اپنی بہادری پر نازاں شخص کی حالت یہ ہوتی ہے کہ اس کا اسلحہ ایک طرف پڑا ہوتا ہے، کپڑوں کے ٹکڑے ہو چکے ہوتے ہیں اور وہ خود شیر کی خوراک بن چکا ہوتا ہے۔ * بے شک رسول اکرم صلی اللہ علیہ وسلم ایک ایسا نور ہیں جن سے روشنی حاصل کی جاتی ہے اور آپ صلی اللہ علیہ وسلم اللہ تعالیٰ کی بے نیام ہندی تلوار ہیں۔ * آپ کو قریش کے ایسے نوجوانوں میں مبعوث کیا گیا کہ جب مکہ کے درمیان میں انہوں نے اسلام قبول کیا تو ان میں سے ایک نے یہ کہا: روانہ ہو جاؤ (یعنی مدینہ کی طرف ہجرت کر جاؤ)۔ * تو وہ لوگ روانہ ہو گئے حالانکہ وہ لوگ کمزور یا بے ڈھال یا بے تیغ یا بے ہتھیار نہیں تھے۔ * وہ اونچی ناکوں والے بہادر لوگ تھے اور ان کا لباس سیدنا داؤد علیہ السلام کی تیار کی ہوئی زرہیں تھیں جو جنگ میں استعمال ہوتی ہیں۔ * وہ زرہیں سفید، چمکدار اور لمبی تھیں اور ان کے حلقے ایک دوسرے میں یوں پیوست تھے کہ جیسے قفعاء نامی بوٹی کے حلقے ایک دوسرے میں پیوست ہوتے ہیں۔ * وہ سفید، خوبصورت اونٹوں کی طرح (میدان جنگ میں) چلتے ہیں اور ان کی شمشیر زنی اس وقت (اپنے ساتھیوں کی) حفاظت کرتی ہے، جب چھوٹے قد کے سیاہ فام لوگ جنگ سے منہ موڑنے لگتے ہیں۔ * وہ لوگ جب ان کے نیزے کسی قوم پر غالب آ جائیں تو وہ لوگ زیادہ مسرت کا اظہار نہیں کرتے اور اگر وہ خود مغلوب ہو جائیں تو زیادہ جزع و فزع نہیں کرتے۔ * (دشمن کے) نیزے ان کے سینوں پر لگتے ہیں اور یہ لوگ موت کے حوض میں (کودنے سے) ہچکچاتے نہیں ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6620]