کہیل بن حرملہ بیان کرتے ہیں کہ سیدنا ابوہریرہ رضی اللہ عنہ دمشق تشریف لائے، اور ابوکلثوم سدوسی کے ہاں ٹھہرے، ہم ان کی زیارت کے لئے گئے، وہاں پر ” صلوٰۃ الوسطیٰ “ کے بارے میں ان سے گفتگو ہوئی، اس سلسلہ میں ہمارے درمیان اختلاف ہو گیا، سیدنا ابوہریرہ رضی اللہ عنہ نے فرمایا: تم نے بھی ہماری طرح اختلاف شروع کر دیا ہے۔ ہم قباء میں رسول اللہ صلی اللہ علیہ وسلم کے حجرہ شریف کے قریب تھے، ہم میں ایک نیک آدمی ابوہاشم بن عتبہ بن ربیعہ تھا، وہ کھڑا ہوا اور رسول اللہ صلی اللہ علیہ وسلم کی خدمت میں حاضر ہو گیا، وہ ایسی ہمت کر لیا کرتے تھے، (انہوں نے رسول اللہ صلی اللہ علیہ وسلم سے مسئلہ پوچھا) اور واپس آ گئے۔ واپس آ کر انہوں نے ہمیں بتایا کہ (صلوٰۃ الوسطی سے مراد) نماز عصر ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6836]