سیدنا عبداللہ بن زمعہ بن اسود بن مطلب بن اسد رضی اللہ عنہ سے روایت ہے، انہوں نے کہا کہ جب رسول اللہ صلی اللہ علیہ وسلم کی تکلیف (مرض الوفات میں) بڑھ گئی اور میں مسلمانوں کی ایک جماعت کے ساتھ آپ صلی اللہ علیہ وسلم کے پاس موجود تھا، تو بلال رضی اللہ عنہ نے نماز کی اذان دی، آپ صلی اللہ علیہ وسلم نے فرمایا: ”کسی کو کہو کہ وہ لوگوں کو نماز پڑھائے۔“ میں باہر نکلا تو وہاں حضرت عمر رضی اللہ عنہ موجود تھے جبکہ حضرت ابوبکر رضی اللہ عنہ (اس وقت وہاں) موجود نہ تھے، میں نے کہا: اے عمر! کھڑے ہوں اور لوگوں کو نماز پڑھائیں، وہ کھڑے ہوئے اور جب انہوں نے تکبیر کہی تو رسول اللہ صلی اللہ علیہ وسلم نے ان کی آواز سن لی کیونکہ حضرت عمر بلند آواز والے شخص تھے، آپ صلی اللہ علیہ وسلم نے فرمایا: ”ابوبکر کہاں ہیں؟ اللہ اور مسلمان اس (صورتحال) کو پسند نہیں کرتے۔“ پھر حضرت ابوبکر رضی اللہ عنہ کی طرف پیغام بھیجا گیا اور وہ اس وقت تشریف لائے جب حضرت عمر وہ نماز پڑھا چکے تھے، چنانچہ پھر انہوں نے لوگوں کو نماز پڑھائی۔ عبداللہ بن زمعہ بیان کرتے ہیں کہ حضرت عمر رضی اللہ عنہ نے مجھ سے کہا: تمہارا برا ہو! اے ابن زمعہ، تم نے میرے ساتھ کیا کیا؟ اللہ کی قسم! جب تم نے مجھے (نماز پڑھانے کا) کہا تھا تو میرا یہی گمان تھا کہ رسول اللہ صلی اللہ علیہ وسلم نے تمہیں اس کا حکم دیا ہے، اگر یہ خیال نہ ہوتا تو میں ہرگز نماز نہ پڑھاتا، میں نے جواب دیا: اللہ کی قسم! رسول اللہ صلی اللہ علیہ وسلم نے مجھے اس کا حکم نہیں دیا تھا، لیکن جب میں نے ابوبکر رضی اللہ عنہ کو وہاں نہیں پایا تو حاضرین میں آپ کو نماز پڑھانے کا سب سے زیادہ حقدار سمجھا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6848]