سيدنا عبدالله بن عمر رضی اللہ عنہما اپنی سند کے ساتھ بیان کرتے ہیں کہ ام المومنین سیدہ عائشہ رضی اللہ عنہا سے پوچھا گیا کہ رسول اللہ صلی اللہ علیہ وسلم کے ہاں آپ کی رخصتی کب ہوئی تھی؟ انہوں نے بتایا کہ جب رسول اللہ صلی اللہ علیہ وسلم مدینہ منورہ ہجرت کر گئے تو آپ کی صاحبزادیوں کو اور سیدنا ابوبکر رضی اللہ عنہ کی صاحبزادیوں اور اہل و عیال کو مکہ ہی میں چھوڑ گئے تھے۔ جب آپ مدینہ منورہ پہنچ گئے تب آپ نے ہماری طرف سیدنا زید بن حارثہ رضی اللہ عنہ کو بھیجا اور ان کے ہمراہ اپنے آزاد کردہ غلام سیدنا ابورافع رضی اللہ عنہ کو بھی بھیجا، ان لوگوں کو آپ صلی اللہ علیہ وسلم نے دو اونٹ اور 500 درہم دیئے، تاکہ اس سے وہ اپنی ضرورت کی سواری خرید لیں، آپ صلی اللہ علیہ وسلم نے یہ سب مدینہ منورہ میں سیدنا ابوبکر رضی اللہ عنہ سے لئے تھے۔ سیدنا ابوبکر رضی اللہ عنہ نے ان دونوں کے ہمراہ سیدنا عبداللہ بن اریقط دیلی رضی اللہ عنہ کو دو یا تین اونٹ دے کر بھیجا اور سیدنا عبداللہ بن ابی بکر رضی اللہ عنہما کی جانب خط لکھ کر حکم دیا کہ وہ ان کی بیوی ” ام رومان “ کو، مجھے اور میری بہن اسماء زوجہ زبیر کو ساتھ لے کر مدینہ شریف آ جائیں، یہ لوگ صبح سویرے وہاں سے نکل پڑے، مقام قدید میں پہنچ کر سیدنا زید بن حارثہ رضی اللہ عنہ نے ان 500 درہموں کے تین اونٹ خریدے، پھر سب لوگ مکہ میں آ گئے، ادھر طلحہ بن عبیداللہ بھی ہجرت کے ارادے سے آل ابوبکر کے پاس آ گئے، چنانچہ ہم سب اور سیدنا زید بن حارثہ رضی اللہ عنہ تیار ہو گئے، سیدنا ابورافع رضی اللہ عنہ نے سیدہ فاطمہ رضی اللہ عنہا، سیدہ ام کلثوم رضی اللہ عنہا اور سیدہ سودہ بنت زمعہ رضی اللہ عنہا کو ساتھ لیا، سیدنا زید رضی اللہ عنہ نے ” ام ایمن “ کو اور اسامہ بن زید رضی اللہ عنہ کو ساتھ لیا، سیدنا عبداللہ بن ابی بکر رضی اللہ عنہما نے ” ام رومان اور اپنی دونوں بہنوں کو ساتھ لیا۔ اور سیدنا طلحہ بن عبیداللہ بھی ساتھ ہی روانہ ہو گئے، جب ہم منیٰ سے مقام بیض میں پہنچے تو میرا اونٹ بھاگ گیا اور میں پالکی میں موجود تھی میرے ساتھ میری والدہ بھی تھی، میری والدہ ” وابنتاہ “ اور ” واعروساہ “ کی آوازیں لگانے لگی، پھر ہمارا اونٹ مل گیا وہ لفت پہاڑی سے نیچے گر گیا تھا لیکن (کسی چوٹ وغیرہ سے) سلامت رہا۔ پھر ہم مدینہ منورہ پہنچ گئے، میں سیدنا ابوبکر رضی اللہ عنہ کے اہل و عیال کے ہمراہ ٹھہری، رسول اللہ صلی اللہ علیہ وسلم ان دنوں مسجد اور اس کے ساتھ حجرے تعمیر فرما رہے تھے، آپ صلی اللہ علیہ وسلم نے اپنی ازواج کو ان میں ٹھہرایا، ہم تھوڑا عرصہ سیدنا ابوبکر رضی اللہ عنہ کے ہاں ہی ٹھہرے۔ ایک دفعہ سیدنا ابوبکر رضی اللہ عنہ نے رسول اللہ صلی اللہ علیہ وسلم کی خدمت میں ابھی تک رخصتی نہ لینے کی وجہ دریافت کی، آپ صلی اللہ علیہ وسلم نے فرمایا: حق مہر (نہ ہونے) کی وجہ سے میں رخصتی نہیں لے رہا، سیدنا ابوبکر رضی اللہ عنہ نے حضور صلی اللہ علیہ وسلم کو 12 اوقیہ اور ایک نش (ایک نش نصف اوقیہ کا ہوتا ہے، اس کی مالیت 500 درہم ہوتی ہے۔ شفیق) بطور تحفہ دے دیئے، حضور صلی اللہ علیہ وسلم نے وہ سب ہماری طرف (بطور حق مہر) بھیجا، اور رسول اللہ صلی اللہ علیہ وسلم نے میرے ساتھ اس حجرے میں سلسلہ ازدواج شروع فرمایا۔ یہ وہی حجرہ ہے جس میں رسول اللہ صلی اللہ علیہ وسلم کا انتقال ہوا اور اسی میں آپ کی تدفین بھی ہوئی۔ رسول اللہ صلی اللہ علیہ وسلم نے سیدہ عائشہ رضی اللہ عنہا کے دروازے کے سامنے مسجد میں دروازہ رکھا، آپ فرماتی ہیں: رسول اللہ صلی اللہ علیہ وسلم میرے پہلو میں جو تین حجرے ہیں، ان میں سے ایک میں حضور صلی اللہ علیہ وسلم نے سیدہ سودہ بنت زمعہ رضی اللہ عنہا کے ساتھ ازدواج کیا۔ رسول اللہ صلی اللہ علیہ وسلم اکثر انہی (سیدہ عائشہ رضی اللہ عنہا) کے پاس ہوا کرتے تھے۔ ام المومنین سیدہ عائشہ رضی اللہ عنہا کا وصال رمضان المبارک میں سن 58 ہجری کو ہوا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6862]