سیدہ عائشہ رضی اللہ عنہا کے آزاد کردہ غلام ذکوان ابو عمرو سے روایت ہے کہ عراق سے حضرت عمر رضی اللہ عنہ کے پاس ایک صندوقچہ لایا گیا جس میں جواہرات تھے، انہوں نے اپنے ساتھیوں سے پوچھا: ”کیا تم جانتے ہو کہ اس کی قیمت کیا ہے؟“ انہوں نے کہا: نہیں، اور وہ نہیں جانتے تھے کہ اسے کیسے تقسیم کریں، تو حضرت عمر رضی اللہ عنہ نے فرمایا: ”کیا تم مجھے اس بات کی اجازت دیتے ہو کہ میں یہ رسول اللہ صلی اللہ علیہ وسلم کی ان سے محبت کی وجہ سے سیدہ عائشہ رضی اللہ عنہا کو بھیج دوں؟“ انہوں نے کہا: جی ہاں، چنانچہ انہوں نے وہ سیدہ عائشہ رضی اللہ عنہا کو بھیج دیا، جب انہوں نے اسے کھولا تو فرمایا: ”رسول اللہ صلی اللہ علیہ وسلم کے بعد ابن خطاب پر کیسی کیسی فتوحات کے دروازے کھول دیے گئے ہیں! اے اللہ! مجھے اگلے سال کے لیے ان کے عطیے کے واسطے زندہ نہ رکھنا۔“
یہ حدیث شیخین کی شرط پر صحیح ہے بشرطیکہ ذکوان ابو عمرو کا سماع ثابت ہو جائے، لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6874]