حمزہ بن ابی اسید ساعدی اپنے والد سے روایت کرتے ہیں، وہ بدری صحابی تھے، انہوں نے کہا: رسول اللہ صلی اللہ علیہ وسلم نے اسماء بنت نعمان جونیہ سے نکاح کیا، آپ صلی اللہ علیہ وسلم نے مجھے بھیجا تو میں اسے لے آیا، سیدہ حفصہ رضی اللہ عنہا نے سیدہ عائشہ رضی اللہ عنہما سے کہا: ”اسے تم مہندی لگاؤ اور میں اسے کنگھی کرتی ہوں“، انہوں نے ایسا ہی کیا، پھر ان میں سے ایک نے اس سے کہا: ”نبی کریم صلی اللہ علیہ وسلم کو عورتوں کی یہ بات پسند ہے کہ جب وہ ان کے پاس داخل ہوں تو کہیں: میں آپ سے اللہ کی پناہ مانگتی ہوں“، چنانچہ جب آپ صلی اللہ علیہ وسلم ان کے پاس تشریف لائے، دروازہ بند کر دیا اور پردہ گرا دیا، پھر جب آپ صلی اللہ علیہ وسلم نے اپنا ہاتھ ان کی طرف بڑھایا تو اس نے کہا: ”میں آپ سے اللہ کی پناہ مانگتی ہوں“، تو رسول اللہ صلی اللہ علیہ وسلم نے اپنی آستین اپنے چہرے پر رکھ کر خود کو ڈھانپ لیا اور تین مرتبہ فرمایا: «عُذْتِ مَعَاذًا» ”تو نے ایک بہت بڑی پناہ گاہ کی پناہ مانگی ہے“۔ ابو اسید کہتے ہیں: پھر آپ صلی اللہ علیہ وسلم باہر تشریف لائے اور مجھ سے فرمایا: ”اے ابو اسید! اسے اس کے گھر والوں کے پاس پہنچا دو اور اسے دو کتان کے کپڑے دے دو“، وہ خاتون اس کے بعد کہا کرتی تھی: ”مجھے شقیہ (بدقسمت) کہہ کر پکارا کرو“۔ ہشام بن محمد کہتے ہیں کہ زہیر بن معاویہ جعفی نے بتایا کہ وہ اسی غم کی وجہ سے وفات پا گئیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6985]