ابوعبیدہ معمر بن مثنیٰ فرماتے ہیں: پھر رسول اللہ صلی اللہ علیہ وسلم کے پاس جب کندہ کا وفد آیا، اس وقت رسول اللہ صلی اللہ علیہ وسلم نے اشعث بن قیس کی بہن قتیلہ بنت قیس کے ساتھ نکاح کیا، یہ سن 10 ہجری کی بات ہے، پھر ماہ صفر کے درمیان حضور صلی اللہ علیہ وسلم بیمار ہو گئے، اور اسی سال 12 ربیع الاول، سوموار کے دن آپ صلی اللہ علیہ وسلم کا وصال مبارک ہو گیا، قتیلہ نہ تو حضور صلی اللہ علیہ وسلم کے پاس آئی، اور نہ ہی حضور صلی اللہ علیہ وسلم نے اس سے ہمبستری فرمائی۔ بعض محدثین نے ان کے ساتھ رسول اللہ صلی اللہ علیہ وسلم کے نکاح کا وقت بیان کرتے ہوئے کہا ہے کہ حضور صلی اللہ علیہ وسلم نے اپنی وفات سے ایک مہینہ پہلے اس سے نکاح کیا تھا۔ دیگر محدثین کا کہنا ہے کہ حضور صلی اللہ علیہ وسلم نے بیماری کی حالت میں اس سے نکاح کیا تھا۔ کچھ محدثین کا یہ موقف ہے کہ حضور صلی اللہ علیہ وسلم نے وصیت فرمائی تھی کہ قتیلہ کو اختیار دیا جائے، اگر وہ کسی دوسری جگہ نکاح کرنا چاہے تو اس کو کرنے دیا جائے، چنانچہ سیدنا عکرمہ بن ابی جہل نے حضرموت میں اس سے نکاح کیا۔ اس بات کی اطلاع سیدنا ابوبکر صدیق رضی اللہ عنہ تک پہنچی تو انہوں نے فرمایا: میرا تو ارادہ ہے کہ ان دونوں کو جلا ڈالوں، سیدنا عمر بن خطاب رضی اللہ عنہ نے فرمایا: وہ امہات المومنین میں سے تو نہیں ہے، نہ ہی نبی اکرم صلی اللہ علیہ وسلم نے اس سے ہمبستری کی ہے۔ نہ اس پر پردے کے احکام نافذ فرمائے ہیں۔ بعض محدثین تو کہتے ہیں کہ وہ مرتد ہو گئی تھی۔ (العیاذ باللہ) [المستدرك على الصحيحين/كتاب معرفة الصحابة رضي الله تعالى عنهم/حدیث: 6987]