سیدنا عبدالرحمن بن عوف رضی اللہ عنہ فرماتے ہیں: نبی اکرم صلی اللہ علیہ وسلم نے میرا ہاتھ پکڑا، میں حضور صلی اللہ علیہ وسلم کے ہمراہ ان کے صاحبزادے سیدنا ابراہیم رضی اللہ عنہ کے پاس گیا، اس وقت ان پر نزع کا عالم طاری تھا۔ رسول اللہ صلی اللہ علیہ وسلم نے ان کو اپنی گود میں لیا، سیدنا ابراہیم رضی اللہ عنہ کی روح قفس عنصری سے پرواز کر گئی، حضور صلی اللہ علیہ وسلم نے ان کو گود سے رکھ دیا، آپ صلی اللہ علیہ وسلم رو دئیے، میں نے عرض کی۔ یا رسول اللہ صلی اللہ علیہ وسلم آپ کیوں رو رہے ہیں؟ آپ تو خود دوسروں کو رونے سے منع فرماتے ہیں، حضور صلی اللہ علیہ وسلم نے فرمایا: میں نے رونے سے تو منع نہیں کیا، میں نے تو دواحمق اور فاجروں کی آوازیں نکالنے سے منع کیا ہے، ایک وہ آواز جو لہو و لعب کھیل کود اور شیاطین کے باجے سن کر نکالی جاتی ہے اور دوسری وہ آواز جو کسی مصیبت کے وقت گریبان پھاڑ کر اور منہ پر طمانچے مار مار کر نکالی جاتی ہے، یہ رونا تو رحمت ہے، اور جو شخص دوسروں پر رحم نہیں کرتا اس پر بھی رحم نہیں کیا جاتا۔ اور اگر سچا وعدہ اور حق بات پیش نظر نہ ہوتی اور یہ کہ ہم اپنے پہلوں کو پچھلوں کے ساتھ ملاتے ہیں (یہ نہ ہوتا) تو ہم تم پر اس سے بھی زیادہ دکھ کا اظہار کرتے، اور اے ابراہیم ہم تجھ پر غمزدہ ہیں، آنکھیں نم ہیں اور دل پریشان ہے۔ اور ہم ایسی بات نہیں کرتے جو اللہ تعالیٰ کے غضب کا باعث بنے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6996]