سیدنا جابر رضی اللہ عنہ فرماتے ہیں: طفیل بن عمرو رضی اللہ عنہ نے نبی اکرم صلی اللہ علیہ وسلم سے عرض کی: کیا آپ دوس کے قلعہ اور اس کے چوکیداروں پر قبضہ کرنا چاہتے ہیں؟ رسول اللہ صلی اللہ علیہ وسلم نے انصار کے فضائل کی بناء پر اس بات سے انکار کر دیا۔ راوی نے فرمایا: طفیل نے ہجرت کی اور اس کے ہمراہ اس کی قوم کے ایک آدمی نے ہجرت کی، وہ آدمی بیمار ہو گیا، اور بہت بے قرار ہوا۔ (اس مقام پر بے قراری کے لئے ” ضجر “ یا اس سے ملتا جلتا کوئی لفظ بولا) پھر وہ ” قرن “ میں چلا گیا اور وہاں پر اس نے چھری کے ساتھ اپنے ہاتھ کاٹ لئے انگلیاں کاٹ لیں، جس کی وجہ سے وہ مر گیا، طفیل نے اس کو خواب میں دیکھا اور اس سے پوچھا کہ اللہ تعالیٰ نے تیرے ساتھ کیا سلوک کیا؟ اس نے کہا: اللہ تعالیٰ نے نبی اکرم صلی اللہ علیہ وسلم کی جانب میری ہجرت کی برکت سے مجھے بخش دیا ہے، انہوں نے پوچھا: تیرے ہاتھوں کا کیا حال ہے؟ اس نے کہا: مجھے کہا گیا: جس چیز کو تم نے خود ناقص کر لیا ہے ہم اس کو ٹھیک نہیں کریں گے۔ سیدنا جابر فرماتے ہیں: اس نے نبی اکرم صلی اللہ علیہ وسلم کو قصہ سنایا تو حضور صلی اللہ علیہ وسلم نے یوں دعا مانگی ” اے اللہ اس کے ہاتھوں کی بھی بخشش فرما دے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن دونوں نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7139]